القصيدة // گالولي حسين
الرادود // سيد فاقد الموسوي
الشاعر // احمد المشرفاوي ــــــــــــــــــــــــــــــــــــــــــــــــــــــــــــــــــــــ
هل من ناصر تگدر الخاطر
ارحم حالك وارحم حالي
ماهي اخوانك بس نسوانك
عدهن ماضل غيرك والي
ايعينك الله مالك امعين
وگومك على الغبره مطاعين
ومنين اجيب المرتضى منين
وجدامك لخيامك
تركض وترد للناس
لاتفگد تتعذب
هذا اليفگد عباس
طيحت الماي ياشط ونسيته
انده عباس گله احتاجيته
يوليدي اتحشم شفتك
وابيض من شيبك شفتك
گوه اتفر راسك لختك
تثبت وتميل
گالولي حسين عينه علالزهره
گالولي حسين خانگته العبره
جيت وثوبك حاضنته
ينشگ كل ماخيطته
ثاري الخيل مواعدته
اخخ من الخيل
ــــــــــــــــــــــــــــــــــــــــــــــــــــــــــــــــــــــ
طلعن كلهن اباب اخيمهن
يومن ومناشغهن سكته
ساعه ومهرك رد من كترك
يصهل والوادم لاحگته
يصيحون زينب طلعوها
واحرگو گلبها ابراس اخوها
سبو الزچيه وشتمو ابوها
حشمتك والگيتك
طايح بس شابح عينك
لخيامك وجدامك
مابيهن حيل يعينك
ثوبك مسلوب ومطشر صدرك
چبدك مصيوب ودم خانگ نحرك
تزحف خيل يردنك تخلص كل مايسحگنك
وكل حافر ياخذ منك وتالي وي الخيل
گالولي حسين عينه عل الزهره
گالولي حسين خانگته العبره
جيت وثوبك حاضنته
ينشگ كل ماخيطته
ثاري الخيل مواعدته
اخخ من الخيل
ــــــــــــــــــــــــــــــــــــــــــــــــــــــــــــــــــــــ
امك ميته ومامفتكه
كلشي انحل وانته المالك حل
انته الوحدك من دون اهلك
لاترضى تموت ولاتعدل
من الزغر چان عليك دمعي
بس انه اذب حجتي بضلعي
يااحله صوت يناغي سمعي
وهسه انته تون سكته
الريح يلچمك لوهب
موجرحك ولاذبحك
انته الكاتلتك زينب
صحتك ويلاه ولامن ها يمه
شيطلع الها من الغاص بدمه
تريد تحاچي بنياتك
والدم يسبگ چلماتك
چن تگول بنضراتك
اه من اليل
گالولي حسين عينه علالزهره
گالولي حسين خانگته العبره
جيت وثوبك حاضنته
ينشگ كل ماخيطته
ثاري الخيل مواعدته
اخخ من الخيل
ــــــــــــــــــــــــــــــــــــــــــــــــــــــــــــــــــــــ
صاير بس دم يادم ينلم
يوليدي شلون يلومونك
بطرگ الوينك وشوفت عينك
ها ثاري الدم غطه عيونك
ماغير دمك كلشي رايح
متبدي چنك موش طايح
يگولون بسمي هواي صايح
هايبني الهضمتني
چانت عينك لضعونك
تتحسر ماتگدر
توگف والحيل يخونك
شمسوي السيف مايرضى يعوفك
تصفگ ياحيف وماهنه چفوفك
اتغمض عن زينب موحل
تفتش تلگاهه عل التل
وتضل بحيلك تتوسل
وكتك ياحيل
گالولي حسين عينه علالزهره
گالولي حسين خانگته العبره
جيت وثوبك حاضنته
ينشگ كل ماخيطته
ثاري الخيل مواعدته
اخخ من الخيل
ــــــــــــــــــــــــــــــــــــــــــــــــــــــــــــــــــــــ
باچر ضعنك يمشي ونك
وي شهگات امك يتلاگه
انت مگطع باچر تسمع
زينب تنعاك من الناگه
لتگول ماعندچ امروة
لاتگول ضيعت الخوة
ماخوذة يحسين گوة
هايختي ها رحتي
بالطف ماضل شي يسوه
باچر عل نوگ زينب تتيسر
وبنص السوگ طول اختك يفتر
باچر راسك يتقدم
ليزيد وضعنك يلتم
والعصه اتسكت المبسم
عن الترتيل
گالولي حسين عينه علالزهره
گالولي حسين خانگته العبره
جيت وثوبك حاضنته
ينشگ كل ماخيطته
ثاري الخيل مواعدته
اخخ من الخيل
ــــــــــــــــــــــــــــــــــــــــــــــــــــــــــــــــــــــ
2August 16, 2026 554 2
