مش عارف هتفهموني ولا لا، بس أنا بحس بالإحراج الشديد لو رايح إنترفيو ولاقيت واحد أو واحدة مجرد ما يشوفوني يتكلموا إنجليزي، وانترديوس يور سيلف، إلا لو الوظيفة خاصة بالإنجلش زي الكول سنتر أو كتابة المحتوى.
يا معلم ما أنا خريج كلية بالإنجليزي، ولو مبعرفش أتكلم ما أنت هتعملي اختبار أو هتديني تاسك بالإنجليزي، وساعتها هتعرف مستوايا، أنا داخل بقولك السلام عليكم تروح عاوج لسانك وتقولي مش هنتكلم غير بالإنجلش...ليه أنت مين؟
أنا جايلك المقابلة وأنا مزاحم نص الموقف عشان أركب ميكروباص ومدي واحد أو واحدة كتف قانوني، وأنت نازل قبل ميعاد شغلك بساعة عشان تركب نفس الميكروباص في موقف تاني عشان متقفش طابور.
أنا من شارع فيصل وأنت من ناهية، أنا بلدي المنوفية وأنت هتلاقيك من كفر الشيخ، وبعدين على الهيصة دي كلها أنت آخر مرة كلت لحمة كانت سنة كام تحديدًا؟
September 1, 2026 316
