للمتزوج والأعزب
البارحة من طلعت للمواكب ، التقيت باحد المتابعين بالصفحة ، فبقيت اسولف وياه دقايق ، گال انه بعد محرم وصفر هو يتزوج ، فطلب نصيحة للزواج ، گتله ماكو نصيحة ثابتة تشتغل على كل الحالات ، لان هذا يعتمد على الدوائر المحيطة بحياتكم من اهل الزوج واهل الزوجة ، والنظام السابق الي كنتوا مكيفين نفسكم عليه ، ومدى استيعابكم للدخول في مرحلة جديدة ، بس بالاجمال الزواج خمس مراحل :
#المرحلة_الاولى : مرحلة الزواج ، هاي المرحلة انت زوج وهي زوجة ، تكون نسبيا مرحلة ذهبية ، كل الي ينقصها سرعة التفاهم وقراءة الشخص الاخر وشيء من المرونة والضبط ايضا ، ومدى فهم الاهالي للطرفين اهمية هذه المرحلة للمتزوجين وعدم التدخل والوصاية على حياتهم ..
#المرحلة_الثانية : هي مرحلة مجيء طفل ، والانتقال من مرحلة الزوج والزوجة الى مرحلة الام والاب ، هنا شويه تكثر المشاكل ، وغالبا تكثر حالات الطلاق في الوقت الحاضر مع ولادة طفل او طفلين ، السبب هو انه احد الزوجين بقه بالمرحلة الاولى والثاني بالمرحلة الثانية او العكس ، مثلا الاب بقه بعقلية الزوج والام انتقلت لمرحلة الام والاهتمام بالطفل وهملت زوجها ، بمعنى هو بقه بمرحلة وهي احتضنت المرحلة الجديدة بالكامل ، فصار هنا شويه تباعد ...
#المرحلة_الثالثة : في بيتنا مراهق ..تبدأ هذه المرحلة وبسبب مواقع التواصل في سن مبكر قد يكون في العاشرة او الحادية عشر من عمر الطفل ، وهنا الاب او الام اي واحد منهم متأخر وباقي بالمرحلة الاولى او الثانية راح تكثر المشاكل وما يگدرون يواكبون حالة التغيير والتحدي الي ظهر فجأة على ابناءهم ، خاصة وانه بدوا يكونون علاقات من اصدقاء يسمعوهم بكل لطف ويگدرون يحجون الهم الاشياء الي ميسمعوها اهلهم ، فاذا بقه الاب بمرحلة الزوج او الاب فقط وما واكب التغيير وانتقل الى مرحلة الصديق المرن فهنا راح تكثر المشاكل بين الاب والام والاولاد والبنات .
#المرحلة_الرابعة : هي مرحلة ما بعد المراهقة واحيانا يصحبها الاستقلال المادي او الفكري او العاطفي ، وهذه مرحلة جدا خطرة ، اذا بقه الاب او الام بمراحل سابقة ويفرضون نفس التوصيات ويتعاطون بنفس العقلية فهنا راح الابناء اقل شي يسووه هو التعامل بشفقة او سخرية من افكار الاهل او مواجهتهم ، لذلك المطلوب في هذه المرحلة رفع الحواجز القديمة والتدريب على المرونة العالية وتثقيف النفس ، يعني هنا يكون المطلوب الاهل يتعلمون ويغيرون نفسهم اكثر مما مطلوب من الابناء
#المرحلة_الخامسة : هي المرحلة الاخيرة بين الرجل والمراة ، خلص الاولاد والبنات كبروا واتزوجوا واحتمال رحل بعضهم ، فهنا اما تكون مرحلة سعيدة مثل شهر العسل او مرحلة كارثية ويكون وجود بدني فقط وطلاق عاطفي بينهم ، هذا يعتمد على مدى نجاح الرجل والمرأة في اجتياز المراحل السابقة بتسلسل ونجاح ونضج واتزان ..
#لاحظ_عزيزي اغلب مشاكل الام مع الچنات سببه انه تتعامل بعقلية الام في المرحلة الثانية مع اشخاص بالغين في المرحلة الرابعة ، يعني من كانت ام وتهتم بشؤون طفلها بنفس العقلية تريد العطاء والهيمنة وابنها او بنتها او زوجة ابنها هم في المرحلة الرابعة .
-مهدي الفريجي
20
13
5July 24, 2023 3.3K 64
