تمريضكو | TamreDko (@tamredko) — Telegram — TG.ME

تمريضكو | TamreDko (@tamredko) — Telegram — TG.ME

الصورة ديه من فيديو لشخص بيتّاخد منه عينة دم في وجود محقق تابع للشرطة

لان الشخص ده كان سبب أنه يخلي الشرطة والطب في كندا في حيرة لمدة ٧ سنين ، لدرجة أنه قضيته بقت مثال في مناهج الطب الشرعي عن التلاعب بالأدلة

في اكتوبر ١٩٩٢ في كندا وتحديدا في بلد صغيرة في مقاطعة ساسكاتش كان بيعيش اسرة بسيطة عندهم بنت اسمها "كانديس فونجي"وكانوا بيدلعوها يقولوا لها "كاندي" بنت عندها ٢٣ سنة أم لطفل

كاندي كانت بتعاني من نوبات هلع حادة واكتئاب بتتعالج منه، لحد ما تيجي في يوم يجيلها نوبة هلع صعبة جداً، فراحت على العيادة الخارجية للمستشفى عشان تاخد حاجة تهدّيها. وهناك كشف عليها الدكتور "جون شنيبرجر"، اللي كان أشهر دكتور في البلد الصغيرة ديه

الدكتور ده كان محبوب جداً والناس بتثق فيه بطريقة غير طبيعية ، لدرجة أن هما مستحيل يصدقوا عليه اي كلمة وحشة

الدكتور وقتها طمنها وقالها إنها مجرد حالة توتر وارهاق، واداها حقنة مهدئ قوي جداً وبعد ما اخدتها غابت عن الوعي فوراً، لما بدأت تصحى وتسترد وعيها حست بألم شديد وآثار على هدمومها بتدل ان تم الاعتـ...داء عليها

في الوقت ده كانت في حالة صدمة ، لكنها أتصرفت بذكاء وقررت تاخد هدومها اللي عليها الاثار ديه وتحطها في كيس بلاستيك علشان يكونوا دليل على اللي حصل وتقدر تثبت بيهم الواقعة من خلال الشرطة

وبالفعل وبكل شجاعة تاني يوم مباشرة اتوجهت كاندي لقسم الشرطة وقدمت بلاغ في الدكتور وقالت كل اللي حصل وسلمتهم الكيس اللي فيه هدومها واللي عليه اثار ما يُثبت جريمته

الشرطة قبضت على الدكتور و واجهته بالاتهامات اللي قالتها كاندي لكنه انكر الواقعة وقال انه دكتور ليه سمعته في البلد والناس كلها عرفاه ، بل وأنه كمان قالهم انه مستعد يعمل اي تحليل يتطلب منه علشان يثبت كدب ادعاء البنت

بالفعل الشرطة عملت تحليل DNA من الآثار اللي على الهدوم ومن عينة دم خدوها من الدكتور... والنتيجة كانت صدمة لكاندي وأهلها لان التحليل طل مش مطابق الـDNA بتاع الجاني مش بتاع الدكتور خالص!

الخبر لما انتشر اهل البلد كانوا متعاطفين جدا مع الدكتور خصوصاً ان زي ما قولنا سمعته في البلد كانت معروفة جداً والناس كلها بتحبه ، ده غير انه متزوج، الدكتور نفسه قال ان البنت بتحاول تبتزه علشان تاخد تعويض

وفي الفترة ديه كاندي و اهلها كانوا منبوذين من البلد والجيران لدرجة ان الناس كرهتهم وبطلوا يتعاملوا معاهم، وبقوا في نظرهم عيلة مش كويسة حاولت تبتز دكتور القرية الشريف

واتقفلت القضية علي كده بس كاندي ما استسلمتش وكانت عارفة ان فيه حاجة غلط وأن هي لازم تثبت ده ، لحد ما نيجي لسنة ١٩٩٦

في الوقت ده قررت تلجأ لمحقق خاص عشان يراقب الدكتور، المحقق يراقب الدكتور لحد ما في مرة من المرات شافه وهو بيرمي منديل وكوباية قهوة كرتون في صندوق قمامة

المحقق استناه لما مشي و اخد الحاجات دي وعملوا ليها تحليل DNA بره على حسابهم والنتيجة كانت صدمة تانية ، لأن المرة ديه التحليل طلع مطابق بنسبة ١٠٠٪ للأثار اللي كانت على هدوم كاندي

كاندي رجعت للشرطة بالدليل الجديد، والشرطة فتحت القضية للمرة التانية واستدعت الدكتور، الدكتور وافق بردو بكل ثقة إنه يتسحب منه دم وبالفعل وصل للمكان المخصص للتحاليل وتم سحب عينة الدم منه

بس الصدمات مبتقفش وده لأن النتيجة طلعت للمرة التانية غير مطابقة !!
طبعا كاندي والمحقق كانوا في حالة من الذهول ، ازاي غير مطابقة وهما عملوا تحليل بنفسهم للحاجات بتاعت الدكتور اللي كانت في صندوق القمامة وطلع التحليل مطابق

في الوقت ده الناس كرهت كاندي أكتر لدرجة ان هي اترفدت من شغلها، والقضية اتقفلت تاني بدون اي دليل يدين الدكتور ، عاوز اقولك ان التحليل ده اتعمل ٣ مرات والقضية اتفتحت ٣ مرات وكل مرة يطلع غير مطابق ، لدرجة ان آخر مرة الدكتور راح متطوع وقال انا اللي بطلب ان التحليل يتعمل علشان نقفل بقي القصة ديه

ويستمر الوضع بالشكل ده بدون اي تقدم لحد ماحصلت المفاجأة الصادمة اللي قلبت الدنيا

بنت زوجة الدكتور من اب تاني طفلة عندها ١٣ سنة راحت تعيط لأمها وقالت لها إن جون بيديها حقن مهدئة بالليل وبيتعدى عليها!

الأم واللي كانت طبيبة هي كمان بدأت تفتش وراه، ولقت في مكتبه نفس المخدر اللي كاندي اتكلمت عنه من سنة ونص وقتها الأم طلبت الطلاق وبلغت الشرطة ووقفت في صف كاندي وطلبت ان القضية تتفتح للمرة الرابعة لأن الشخص ده فعلاً معتـ..دي

هنا الشرطة عرفت ان فيه حاجة غلط، بالفعل وافقت تفتح القضية للمرة الرابعة، المرة دي، وتحت إشراف صارم وتصوير فيديو من مدير الشرطة شخصياً اثناء اخذ العينة ، ما بس المرة ديه ما اكتفوش بعينة الدم، سحبوا دم، وأخدوا مسحة لعاب من بقه، وشعيرات من راسه

وهنا كانت الصدمة ،عينات اللعاب والشعر مطابقة تماماً للـ DNA بتاع المغتصب اما عينة الدم مختلفة ، طب ازاي ؟