السلام عليكم - زملائنا الأعزاء ، نتمنى تكونون بخير وصحة وان شاء الله عدت العطلة عليكم بخير وسلام . - مثل ما تعرفون ، ما بقى شيء حتى يبدي الدوام بالمرحلة الخامسة واكيد صار عدكم اطلاع أولي على المحتوى العام العلمي الي راح ندرسه في هاي المرحلة ولربما اول عائق واجهتوا هو إيجاد المصادر الصحيحة لدراسة هذا المحتوى وبالأخص لكثرة ما راح يتم دراسته والاختلاف الحاصل بينهم ف حتشكل عائق اولي حاولنا نحله الكم ونخلصكم من المعاناة الي ممكن تستمر سنة كاملة في التغلب عليها . - اني بكل عطلة قبل شهر من الدوام ، اكعد ادور وابحث على المصادر الي ممكن تفيدني في دراسة المرحلة القادمة واستند في بحثي على عدد كبير من الأوليات والمميزات الي احاول الكاها في هذه المصادر ولكن كلها تصب بمنحى واحد وهو الفائدة العلمية قبل كل شيء . - جنت ناوي ما اشاركم هاي المصادر لان بكل بساطة اني ما درست الخامسة ولا جربتها حتى اعرف هل فعلا راح تفيدكم او لا ، ولكن الي خلاني اشاركها معاكم حاليا هو التالي : 🔴 1 ) كل السنوات الماضية وبالاخص اخير مرحلتين من جنت ارتب مصادري قبل لا ادخل المرحلة واشاركها مع كل زميل يراسلني عليها ف من خلصت المرحلة لكيت انه هاي المصادر الأولية قبل لا ادخل بالمرحلة هي نفسها بعد نهايتها باختلافات اكيد ولكن نوعية الإختلاف يمكن تداركها او يمكن التعويض عنها بأمور مختلفة اخرى . 🔴 2 ) عدم وجود محتوى حقيقي يوضح ماهية المرحلة الخامسة وطبيعتها من ناحية الفائدة من مختلف المصادر الي ممكن نحصل عليها ونستفاد منها وقلتها ، سابقا كان الزميل والدكتور الخلوق خريج كليتنا د.محمد تقي يوضح النا بعد نهاية كل مرحلة درسها كل شيء يخص المرحلة ولكن مثل ما تعرفون الي يخلص خامس ما يبقى وقت للسادس ف يتلكأ بالتوضيح وما يصير وقت اله لذلك اضطريت اجمع كل شيء بمكان واحد عسى ولعلى تفيدكم وتكون هاي التصفية الأولية الكم لصالحكم . 🔴 3 ) اني دائما ماخذ نظرة انه الطلاب الي بنفس المرحلة وياي يعرفون كل شيء اعرفه (ماعرف منين جبتها بس هي بنفسي) ف اكول واذا نشرت الهم هيج قابل ميعرفوا اكيد يعرفوا وهذا خلاني اتلكأ بنشر كثير وكثير من الأمور الي ورا اختلاطي وتجربتي وخبرتي بمختلف المستويات والطبقات الطلابية ومختلف المراحل كانت حتفيدكم ، بالأخص من وضحت وشرحت المرحلة الرابعة والثالثة بقناتنا الثانية توضح هذا الأمر اكثر عندي ف حسيت بضرورة ووجوب انه انقل الكم كل الي عندي حتى تستفادون منه ويعم عليكم بالفائدة الي ارجو ان تحصلون عليها بدراستكم ، ف نتيجة هاي الأمور وغيرها من الي ما اريد اذكرها حتى ما تصير قصة جبيرة ارتأيت اشاركم بيها واكدر اكلكم تكدرون تثقون بهذا المحتوى والي شاركتكم ياه بالملف وتمشون عليه واني اكول هذا الكلام مستند على خبرة وتجربة في هذا المجال وكوني من الطلبة الي اصلا ما يعرف الكلية شنو ومنو الدكاترة مجرد Self - Learning وبعدين ارجع بنهاية الكورس اشوف شنو الدكاترة وشنو الوضع ف حكدر افيدكم بهذا الجانب . 📌 تنويه : عندي كلام احب اكوله الكم قبل لا تشوفون الملف وتبدون تطرحون اسئلة عنه او تشوفون بيه غموض ، كالآتي : 🔴 1 ) كل شيء يخص الملف راح اشرحه واوضحه مفصلا بالايام القادمة ، وبنهاية الشرح والتوضيح راح اذكر الكم الخلاصة الي اعتقد واتوقع من الخبرة الي امتلكها راح تفيدكم بحيث اضمن الكم ما تصير هوسة عليكم ويترتب كل شيء عدكم . 🔴 2 ) اني قبل شهرين شرحت عن المرحلة الرابعة مفصلا ، واول فديو سجلته شرحت فد جزئية هي نفسها راح نحتاجها بالخامس واتمنى منكم تشوفون الفديو اثناء هاي الفترة لان من راح اشرح الملف اعلاه ما راح ارجع اذكرها الكم ف احتاج منكم انه تشوفوها وتفهمون قصدي بيها حتى من اوضح الملف فوك تفهمون كثير من الأمور الي حذكرها ، رابط الفديو : https://youtu.be/n2qazGs6Gfo?si=4RDD-D8W9dudgpdI 🔴 3 ) مكررا واحب اكد على نقطة كلش مهمة قبل لا اختم ، وهي انه حاليا بس اريدكم تعرفون اكو ملف جمعته الكم بيه كل شيء يخص الخامس نظريا من المصادر المفيدة بمختلف الأماكن ولكن راح تكولون شنو نختار منها ؟ شنو يفيدنا ؟ زين الخامس طويل شلون نلحك ؟ زين شنو الي ملونه بالاصفر ؟ وغيرها من الاسئلة الي راح تتبادر الى ذهنكم راح احاول كلها اغطيها وتلكون اجوبتها اثناء الشرح الي راح اقدمه الكم في قادم الأيام القليلة (حاليا نشرته لان بعض الزملاء راسلني على المصادر الي تخص الخامسة وبلغتهم راح انشرها قريبا لان ادري الاغلبية بدت تبحث وتشوف المحتوى على الخامس ف ميحتاج تبحثون بعد كل شيء جمعته بمكان واحد) . 🔴 4 ) الي ما وضعت شرح اله ولاسباب راح اوضحها بالفويسات بقادم الأيام هي مادة الأطفال ومادة الجراحة في الكورس الثاني فقط ، البقية كل شيء موجود . 🔴 5 ) الي ما يعرف اي شيء عن الخامسة ويريد Overview عليها عام ، ف يكدر يسمع تسجيل صوتي للدكتور محمد تقي موجود بهذا الرابط : https://t.me/synaptogenesis/3595
4
3
