باقي تقريبا ثلاثين يوم على الامتحان الوزاري، وهالفرصة لازم تستثمرها بكل وعي. لأن هذا الشهر هو اللي راح يحدد مستقبلك، ياما يرفعك ويخليك ترتاح، ياما يرجعك للدوام مرة ثانية. فخلي نخلي خطة مدروسة، تفيدك، وتنظم وقتك حسب مستواك وظروفك.
أغلب الطلاب عندهم مواد مأجلينها، أو بيها ضعف. فراح أطرح أفكار تكدر تبني عليها جدول خاص بيك، وعدل بيه مثل ما تحتاج.
نفرض عندك ثلاث مواد كبيرة ومهمة:
رياضيات، كيمياء، فيزياء
ويّاهم مادتين او مادة حفظية مثل أحياء أو أدب.
هنا لازم تعرف شلون توزع وقتك صح، وتستفاد من كل ساعة. حتى إذا قاري بس جزء بسيط، هذا كافي يقلل التوتر ويخليك تبدي بثقة، لأنك مو صفر.
خلي نقسم المواد الأساسية على عشرين يوم، والباقي نرتب بيه الحفظ والمراجعة.
خطة الرياضيات:
فصل أول يوم
فصل ثاني يوم
فصل ثالث يومين
فصل رابع يوم
الفصل الخامس والسادس توزعهم على الأيام الباقية بشكل خفيف
خطة الكيمياء:
فصل أول يوم
فصل ثاني يوم
فصل ثالث يومين
فصل رابع وخامس يومين
فصل سادس يوم
فصل سابع يوم
الفصل الثامن توزعه مع باقي الأيام حسب الحاجة
خطة الفيزياء:
فصل أول يوم
فصل ثاني يوم
فصل ثالث يومين
فصل رابع يوم
فصل خامس يوم
فصل سادس يوم
فصل سابع يوم
الفصول الثامن والتاسع والعاشر تتوزع على الأيام الأخيرة
بهالطريقة، المواد الأساسية تخلص خلال عشرين يوم فقط، ويبقى عندك وقت كافي للحفظ والمراجعة.
نجي للمواد الحفظية، مثل الأحياء أو الأدب:
يومياً الصبح من الساعة ستة للساعة عشرة، تقرأ جزء من الحفظية، ورقة أو جزء، حسب طاقتك. إذا عندك مادتين حفظ، وزع الوقت بينهم.
بهالأسلوب، راح تضمن إنك مخلص المادة الحفظية قبل الامتحان بأيام، وتخلي لها أربع أيام أو خمسة مراجعة ثانية، تراجع وتحل أسئلة.
وإذا شفت أكو فصل معين بيه ضعف أو ناسيه، خليه ضمن مراجعتك الثانية. الصبح راجع مادة حفظ، وبعدها محاضرة من اللي تحس بيها عندك ضعف مثال: ورقة ادب + محاضرة احياء + نقاط ضعفك او مراجعة ثانية من فصل غير مادة او كملت مادة وتراجعها مراجعة ثانية من الستة لحد العشرة تقريبا ٤ ساعات كلش كافية.
باختصار، هذا جدول انطيتك ياه حتى يساعدك تبدأ، وتبني عليه حسب وضعك. لا تضيع الوقت، الثلاثين يوم تنحسب عليك، وكل ساعة تكضيها بالمذاكرة راح ترد لك نتيجة.
شد حيلك، واستعن بالله…
10
2July 27, 2025 969 12 18
