انا برتكب ذنوب مهما حاولت أوقف مش عارف، بغلط كل مرة و ضميري بيأنبني… — Sections. 4rd — TG.ME

انا برتكب ذنوب مهما حاولت أوقف مش عارف، بغلط كل مرة و ضميري بيأنبني ومش قادر أكون مثالي.. سيدنا آدم كان في الجنة وبرغم كدا الشيطان قدر يغويه.. و قُلنا يا آدم اسكُن انتَ وزوجك الجنةَ وكُلا منها رغدًا حيث شِئتُما ولا تقربا هذه الشجرة فتكونا من الظالمين .. وبعدين حصل إيه؟.. فأزلهما الشيطان عنها فأخرجهما مما كانا فيه.. يعني برغم رحمة ربنا بآدم بالجنة _ مقدرش يتحمل و دي حكمة ربنا.. لأن ربنا خلقنا كدا.. خلقنا مش قادرين نتحكم في حاجات كتير و إننا بنخطأ كتير و هنرتكب ذنوب كله هيرتكب ذنوب لكن هنا نوضح بعض النقاط بس .. في ذنوب هتحصل دا اكيد .. لكن في ذنوب أو كبائر نقدر نمتنع عنها و دا اكيد .. اي حاجه ربنا أمرنا بيها في القرآن و نهى عنها فهي مُحرمة تمامََا و نقدر نتحكم فيها سواء نعملها او لا.. يعني متروحش تجيب سكينة و تقتل واحد و تقول الشيطان غواني.. او اتنين يرتكبوا علاقة زنا و نقول الشيطان او واحدة تبعت صور لواحد.. كل دي حاجات ربنا نهى عنها و حرمها تمامََا على فاعلها فهو نقدر عادي نمتنع عن حاجات كتير.. لكن هل مش هتغلط خالص؟.. لا مستحيل.. هتغلط يعني هتغلط.. ربنا عايز يشوفك بتغلط و بتتوب و بتستغفر و بتصلي و بتصوم و بتقرأ القرآن و بتتزوج زوجة صالحة و بتعلم أولادك عمل صالح.. ربنا قال بعد كدا في سورة البقرة : قُلنا اهبطوا منها جميعا فإما يأتينكم مني هدىً فمن تبع هُداي فلا خوف عليهم ولا هم يحزنون وبرغم كل دا.. حتى لو عملت كبائر و وقعت.. ربنا وعدك بالتوبة.. والله يريد أن يتوب عليكم ويريد الذين يتبعون الشهوات أن تميلوا ميلََا عظيما .. يريد الله أن يخفف عنكم .. وخُلِق الإنسان ضعيفا ربنا عارف خلقك ازاي و خلقك ليه.. المهم انت متتوهش عن الجنة.. العُمر بيجري متعرفش ازاي.. متتوهش متتوهش عن الجنة.. كل ما تغلط استغفر و متكابرش و اعترف إنك أخطأت، هتلاقي نفسك غلطت في حاجه تانية اعترف بيها ومتكابرش و متكررهاش، هتلاقي نفسك غلطت تالت اعرف بغلطك متكابرش و صححه.. الحياة كدا يا عزيزي عمرك ما هتكون مثالي بس لما تغلط استغفر.. كل ما تغلط و ترتكب ذنب حاول تقوي إيمانك و علاقتك بربنا اكتر.. مش هتكون مثالي.. بس هتكون قريب من الجنة.. الجنة ونعيمها يا عزيزي.. احنا موجودين هنا عشان ربنا قال من تبع هداي فلا خوف عليهم ولا هم يحزنون.. والشيطان قال فبعزتك لأغوينهم أجمعين.. عارف يوم القيامة هيحصل إيه؟ " وقال الشيطان لما قُضي الأمر إن الله وعدكم وعد الحق ووعدتكم فأخلفتكم وما كان لي عليكم من سلطان إلا أن دعوتكم فأستجبتم لي فلا تلوموني ولوموا أنفسكم" هتلاقي الشيطان نفسه بيقول انا معملتلوش حاجه انا دخلت في دماغه فكرة.. قولتله يعمل كذا و كذا.. هو كان حابب من جواه يعمل دا لأنه لو مؤمن مش هيستجيب أبدََا.. زي مثلََا لما واحد يكون قاعد مع صاحبه و قاله يشرب حشيش.. هو قاله فكرة.. بس هو هيعمل إيه؟ أو واحدة قاعدة مع زميلتها و واحدة منهم بتقنع التانية تقلع الطرحة و تجرب.. شوف شكلك هيبقي حلو إزاي؟.. جربي بس؟ حاول تفوق.. و ركز.. متسرحش.. كل ما تفهم اكتر كل ما إيمانك يزيد اكتر كل ما هتحب الجنة ونعيمها وتعرف إن مفيش حاجه تستاهل إنك تخسر الجنة.. كل ما تفهم اكتر كل ما الدنيا دي هتصغر في عينيك كإنها ولا حاجه، و دا ببساطة لأن عينك ع حاجه أعظم بكتير.. عينك ع الجنة.. متستصغرش الذنب ها.. باب المعاصي بيبدأ بخطوة و باب التوبة بيبدأ بخطوة.. ومتأجلش الاستغفار او التوبة.. أبدََا يا صديقي