شفتك باردة معودها بس ع الماي
ودخان الجكارة شفافي شاربتة
من كد الونين مفطر الحيطان
وجفني من البواجي عيوني عاصرته
احن لعيونك وتوكف الدنيا وياي
واتذكر الماضي البية كاسرتة
اجي راكض لبابك رغم ما زعلان
وارجع والهضم رجلية جايبتة
ارد لسنينك ويركض براسي الشيب
سوادك بية عاش وشعري بيضتة
اعذارك ذمة تبقة بركبتك للموت
زغيرة الدنيا كتلك والزغرت انته
لدغة حية جرحك ما تكتله النار
سهل جرح الرصاص النار كاتلتة
الترس جودك بدمة تعطشة بيدك ليش
الذب روحه على مايك وانت عطشتة
عود انت الجبير الما تسوي العيب
عيبك من اجيت بوجهي طشرته
نهر كل ما اصيرن عكس تمشي وياي
عضم هدهد وياك العمر خلصتة
اذا أحسب ذنوبك يضحك النمرود
صنم وجفوف اديك بزود شابكتة
من ضيعت وجهك ضيعت مكفاي
بدربك من مشيت خيالي ضيعتة
ما هزن رغبتي مكذلات الليل
انة الخاطر ضلامك جم كمر دستة
بجمر تكطفني بيدك وانه مو شيطان
الك ساعة عذاب تفجر البركان
جهنم فوك واكثر منها حاملتة
أذا جانت جهنم الها سبع ابواب
الف باب لعذابك روحي فاتحتة ..
حيدر حسان
