Tenne ga'ara ilama macciishshitoe!
Konni lamu diri giddo babbaxxino korkaarinni sae sae addi addi qoqqowubba ha're hatte daga tenne gobba giddo uminsanna wole daga daafira coydhannore ofolle macciishshate kaayyo afi'roommo. Halaaleho wole daga meessi daga heedho hooggo hajo assite wole daga daafira qarrante hasaabbannoti dino. Mitootu isinni meessita shaqqado baatto adhatenna meessiha biifino quchuma anganni adhate, hoogguro gutunni gashsha hoongummoro gobbate keeru daara didandaanno yite coydhanna macca'yanni macciishshoommo.
Macciishshoommoha lowo halaale hiikku macciishshanna coyi'reemmo, dagano buxxe qarru aana nooti sagaletenni umo dandaa qarrisinoseti ma macciishshitannae yee mulla techo ille la'anno geeshshiri aana fonii'yata coyi'ranni keeshshoommo. Tenne gobba giddo Sidaamu daga horo, ayimma, dhagge, budenna afoo agarate mine cufi'ne malama hasiissannota hige hige coyi'roommo. Callinni ronse, callinni donde, callinni dadda'line ikkino deerra marrammora dandiineemmo. Yara daga giddonni fulloommore ikkinummoro mitto darga waalchu cufaminonkere ikkanke digatttanno. Balanxe Sidaamu gede worbino! yinannilla hee'noonni. Duuchu mannino yaannilla no.
Qoqqowu mootimma kalaqi'nummo gedensaanni kayinni qarru bati'rinonke. Dhiibbe batidhinonke. Duuchu wolaphonke beebbifatino. Meessi balalino techo horo calla hogoofi'rate fanino faronni seyanyo daggino. Kaayyo lowoti ba'ino. Ba'annino no.
Balaxxe seeraancho ikkitinokki doogonni meessi wolqaweelooti, mooraanonna ruukkaddu darga amaddanno. Hakkuri darga amaddu uurrinsha giddo balaxxe meessi jawa hiiqqite ka'anno. Baxxu gede moortanno. Gosooma goola kalaqqanno. Shiima yanna gedensaanni cancu ka"anno. Hakkiinni "Sidaamu massaga didandaanno!" yiisiissanno. Meessi oosono taaga meessihu hiiqqinonsa komara konni manni ledo hoo yite ka'anno. Gedensaanni "Heewisame qeelihu gashsho!" yinanniti dagganno. Tini heewisama Sidaama callaati. Jajjabba qoqqowubbara Amaaraho, Oromote, Tigiraye gedeewa diegenninoonnite. Hatte daga ooso ikkadda duuchu noohura kaayyo wolootaho diaamantanno. Konniicho meessi nafara meessi ooso rosa ajjukkinni, afa ajjulkinni, heewisante qeela hooggukkinni xagarre dagate kaayyo hawulunkanni.
Coy gedera Hawaasi Yunveriate Pirezidaantimma darga be'ro meessiri kalaqqino so'ronni hoongoonniho. Dr. Daawiti Waachamo masdinoommihura joogishamoonke mannu. Hansoonnihu Hawaasaati. Hakku dayno manni maa assanni nooro yanna yannatenni anfoonniho. Mitto widoonni meessi mooraano sharrammanna widoonni wolu daynohu meessi daga qoosso baxita assannoha olamanna horichu horrame goofanni no.
Be'ro barra Riferaalete Hospitaale heewotenni mitte dottorcho qeeltino yinoonni. Qeelihu qeelo heewo heedhu geeshsha qeelanna qeelama noote. Gano kayinni heewotenni aliidite. Tenne daga ciiggisha qara mixonsaati. Riferaale ikkadda meessi afaaleeyye gashshitoommero: afuunni tidhinanni. Lowo jiro noona mannuno hosipitaallano wodani gede horonsidhamno. Xissaminohu qarraminihu silke bilbi'le nafa qarra tidhanno. Meessi nafa diduuddinanni. Roorinni, specialist ikkotannoti rosaanonke lowo kaayyo afidhanno. Meessi manna meessi daga irki'ne kaa'linanni. Rosu Uurrinshubba massaganna polotiku uurrinshsubba massaga iimana uullati. Lowo kaayyo, lowo hexxo, dagate lowo horo noohu jajjabba uurrinshubba giddooti. Polotilahono lowo qiniite hakko hee'ne kalaqa dandiinanni. Kaayyo hatti adhantanno woyte woroonnino lowo kaayyo hawulukantanno. Hatto hattoonni assinanni daga wolqa hunnanni ga'a hasi'noonni darga Sidaama shiinshinanni deerra mara digattanno.
Umonke dandiine hiikkono heewisamme xinqi'ne hee'ra dandiineemmo. Kayinni Sidaama umo hunnanna worre la'ne di"ikkino. Manni nafarano meessi qaerano borojje ikkine mannunni maa'nine gala ninkera iqqanke dikkitino. Sidaamu daga gede jawaata ikka hoongummoro hojjinni tonaame jawaante tenne gobbara macciishshamme afi'ra didandiineemmo. Tini gobba goodantinohu daganna dagoomu hubbo hubbonniiti. Wolu ninke aana malame, halame darga amadanna meessa balala ga'a ilama waaga baatisiissanno.
28
13
1January 9, 2026 3.9K 1
