LUWA | የሲዳማ ህዝብ ባህላዊ ዩኒቨርስቲ ነው!!
Luwu Sidaamu daga budira mudukkoho.
Mayra mudukkoho yootto yitinoonniro, Luwu giddo ronsannikki budi hiikku no hanni? Luwu mannu oosimmatenni jawimmate (cimimmate) widira reekkamanno uurrinshaati. Mannu dagoomitte heeshsho giddo kipho tirranni gara, gutunni loosi'ne lophinanni gara, gobbate seyanyo gargadhine, utuwimma agadhine hee'nanni gara torbinanni uurrinshaati.
Luwu Sidaamu bude haammmata hanqafino gootaaraati. Luwu dibude callahona uurrinshate. Sidaamu Yunveristeeti. Xa ko Luwi may deerrira no? Luwu Maanchisira no? Luwanni noohu no? Luwa itisanni noohu no? Lolloqu no? Injuchu no? Lumbanni dargi no? Ammaa Magani!
Oromote daga GADA budenaa Yunveristete xiinxallote korse assite iillishidhu geeshsha ninke insaa ledo taalo ayimmanna taalleenyu sharrora baraha dirrine gaarammoommo daga techo wolaphinoommo yine baandeera qasi'nummo barra baaluri illenke la'anna xoanni diha'rino?
Mitte xa'mo xa'meemmo'nena dawarre"e. Gadaanni beetti Gadaanni hooode ha'ranni no? Mootete beetti mootichu ledo xaadu noosi? Waare noosi? Geelote beetti Geelo ledo hosanni no? Womu beetti annu faana no? Gaannu beetti Gaannu gallo gara gale no? Nookkiro may budi nooyya? May Sidaamimma nooyya?
Sidaamimma annunni beettoho raggennite. Annunni beettoho budunna balchoomu ragge hoogguro, sholline manca'ne hee'noommoha dilawanno'ne?
Ayti konni budi ba"a daafira xa'mamannohu? Qaete Geerchu bude beetto ofolli yee rosiisa hoongotera alba annisi halaali xa'ma diagurannosi? Wogate Biiro Sidaamu uyno hadara doogo huntinotera dhagge xa'mitannose. Yunveristubba dhaggete xa'mamaanooti. Rosino manni rosinokki anni amaxxe daynoha dancha bude huntinotera xa'mantannote. Ammanote uurrinshubba kaire baala sheexaanu ledo xaadissanni mannu hornya afi'rinokki shota manna ikkanno gede faro fante agurtinotera xa'mantannote.
Polotiku massagaano dancha bude woxunninna polotiku wolqanni bowirsa hasiissanna ba"ara facci assite agurtinotera dhaggete xa'mamaanooti. Miidiyubba budu fooli noowa hasse marte jawaachishshe dagate ledo xaadisse looso loossinokkihura xa'mamooshshunni digatanno. Ilama yannate tekinoloje calla harunsa agurte badhe higge ayimmansa xawishsha ikkinoha budensa afate hixamanya hoogansara annuwa macciishsha giwansara ga'a gaabbitannote!!
Luwu budunni fule dhagge ikke gatanni noona manna’ya daga’ya danchu budi baoonkena dawadhanno gari daafira hasaambo. Annu annunku qeechanke fullo. Luwanke xa’mammo. Lumbe hee'rate hajo daafira hasaambo! Albi Luwa darga qola nafa hoongummorono ajay ajeenna 12 kifile rosse Yunveriste hadhanno rosaano bude hasaambanni darga marte pirojekite loossanno doogo mallo!!
SBQ
Sadaasa 21, 2018
Hawaasa, Sidaama| Ethiopia 🇪🇹
📸: SBC| Abayineh Akililu🙏
13
4
1December 30, 2025 3.2K
