سلامُ الله عليكم مُتابعي منصّة "إقرأ"
وردتنا أسئلة كتيرة جدّاً جدّاً عن مواعيد التقديم فحابين نبشركم إنّه بإذن الله حيتم فتحُه بكره السبت الموافق 29/6/2024 وحيكون الموسم الأوّل من التقديم مُتاح لحد مطلع أكتوبر.
لكن برضو قد يسأل السائل:
♦️ مطلوب منّي شنو حاليّاً قبل التقديم يفتح؟ 🤔
مطلوب منّك يا عزيزي تجهز جوازك ورسوم التقديم والأهمّ منهم توثق شهادة الثانوي في الخارجية والسفارة المصرية ولو انت أصلاً في مصر ممكن توثقها في الخارجية المصرية وبعدين في السفارة السودانية ولو ما عندك الشهادة ما تشيل هم، بتطلع من وزارة التربية والتعليم في بورتسودان أو من مدرستك الامتحنت منّها لو مُتاحة.
⭕️ ملحوظة يا عزيزي:
"لو انت شهادة عربيّة فالتوثيق حيكون من خلال نفس الخطوات"
♦️ طيب هل ضروري أوثّق الشهادة للتقديم الأونلاين؟ 🤔
أيوة ضروري توثق الشهادة!
لأنّه إذا قدمنا ليك بالشهادة من غير توثيق حيرجع الطلب باستكمال بيانات ويتأخر القبول.
♦️ طيب بقدم على كم رغبة؟ 🤔
بتقدم على عشرة رغبات ممكن نفس التخصص جامعات مختلفة وممكن تخصصات مختلفة نفس الجامعة ونسب القبول والرسوم وضحناهم في المنشورات السّابقة ممكن تلقاهم في منصّة إقرأ على التليجرام وفي قُروب الواتساب.
♦️ طيب داير أتقبل في جامعة معينة اعمل شنو؟ 🤔
أوّل حاجة احرص انك تقدم بدري عشان الأمكان محدودة للسودانيين، تاني حاجة في الموقع حنرتب ليك الرغبات حسب طلبك وتنسيق الوافدين بيأخد بعين الاعتبار ترتيب الرغبات، حاول برضو أبحث واعرف اكتر عن نظم الجامعات المختلفة والمميزات وحدد كذا رغبة قبل موعد التقديم.
ولو واجهتك أي صعوبة في الحاجة دي، ما تخاف وما تتردد إحنا موجودين دايماً عشان نقدم ليك استشارة كاملة تساعدك تختار وتتقبل في جامعة كويسة!
♦️ طيب القبول ح يأخد كم؟🤔
على حسب الوقت الانت قدمت فيه، في أوّل أيّام للتقديم بيطلع أسرع وفي اخر أيّام بيتأخر عشان الزحمة والطلبات بتكون بقت كتيرة واحنا في مؤسسة إقرأ حريصين إنّه نخلص ليكم الاجراءات كلها في وقت وجيز ونضمن ليكم قبول في وقت مناسب.
♦️ طيب لو قدمت ح ادخل مصر كيف؟ 🤔
السنة الفاتت الوافدين نزلت فورم تقديم للموافقات الإلكترونية وكانت بتنزل قوائم الأسماء كل فترة على حسب ميناء الدخول، ولو كنت في السودان أو مقيم في دولة تانية ممكن تأخد صورة إفادة القبول النهائي وصور إيصالات الدفع وتأخد تأشيرة الطلاب من السفارة المصرية ولو نزل أي جديد بخصوص التأشيرات حننزل ليكم أوّل بأول.
خلّيكم قريبين عشان البوست الجاي إن شاء الله حنتكلّم بتفصيل أكتر عن التحويل وإعادة الترشيح وتعديل الترشيح 😉✨
#مؤسسة_إقرأ_التعليميّة
#إقرأ_مصر
1June 28, 2024 621
