خمس أيام مرت و بيتنا صاير عبارة عن سرداب ظلمة و وحشة مو لأن الكهرباء طافية لا والله بس لأن نبع الحنان زعلانة و متحچي وياي كلمة وحدة تخيلوا حتىٰ المراية من أباوع بيها أحس وجهي مكسور و حتىٰ جهال العائلة إللي چانوا يركضون وراية صاروا بس يشوفوني ينهزمون و يصيحون چنهم شايفين وحش كل شي بالدنيا صار ضدي لأن أُمي زعلانة … ما گدرت أصبر أكثر النار إللي بگلبي أكلتني شلت التلفون وخابرت صديقي گلتله : الوضع ميتعدل بعد … أُمي زعلانة و الدنيا سودة بوجهي أمشي وياية نشرتيلها الوردة و اللفة إللي تحبها ؟ بلكي تكسر الشر و يحن گلبها . رحت وجبت الوردة و وجبتها المفضلة ورجعت للبيت أمشي علىٰ أطراف أصابيعي خليتهن بمكانهن وعفتهن ورحت صعدت لغرفتي .. بس يا نوم؟ يا راحة؟ كل شوية أنزل من غرفتي مثل الحرامي أختل ورا الباب و أباوع أكلت اللفة؟ لا .. خلت الوردة بكاسة المي حتىٰ لا تموت؟ هم لا .. اللفة بعدها بمكانها ما إنمدت إيد عليها والوردة بدت تذبل وتدنگ راسها كأنما يئست من صلحنا هنا گلت خلاص هاي المرة كبرت الخيبة و أُمي سدت بابها للأبد گعدت الصبح مالي خلگ حتىٰ أفتح عيني نزلت بكسرة خاطر وگلت هاهية الوردة أكيد ذبلت و ماتت مثل حظي بس فجأة .. شفت الوردة "منعنشة" و محطوطة بكاسة المي بذيج اللحظة الدنيا إللي چانت جهنم إنطفت نيرانها بهاللحظة عرفت إن أُمي سگت روحي قبل لا تسگي الوردة و الوردة بكاسة المي چانت هي "صك الغفران" هنا عرفت أنه هي رضت لأن إللي تسگي وردة جابها إبنها معناها سگت روحه إللي چانت ميتة من العطش لرضاها و من يومها رجعت الدنيا تغني ، ورجعت المرايا تضحك بوجهي و رجعوا الجهال يحبوني .
3
2
1
