ما أخاف من قصة قيس بن الملوح و ليلىٰ العامرية … أخاف من اللحظة إللي أكتشف بيها إنه أكو جزء مني يشبه قيس أكثر مما أتصور مو ذاك إللي يركض بالصحراء ولا إللي يكتب شعر ذاك الجزء إللي إذا يحب ، يحب مرة وحدة بس إللي إذا يختار ، يختار كلشي و إللي إذا ينكسر ، ما يعرف يرجع مثل قبل . إحنة نضحك علىٰ قيس نگول عنه مجنون نتفلسف و نحلل حالته … بس بيني وبينكم ؟ أكثر واحد يخاف من قيس هو الإنسان إللي سبق و حب بهالدرجة و خسر إللي تعلم بعدها شلون يصير عقلاني شلون يحط حدود شلون يحچي أقل و يحب أقل و يتعلق أقل … بس كل ليلة من يطفىٰ كلشي يبقىٰ ذاك الشعور القديم واگف بزاوية گلبه يسأله ؛ لو رجع بيك الزمن چنت راح تحب بنفس العمق ؟ لو راح تختار السلامة ؟ قيس ما إختار السلامة إختار الشعور الكامل ، حتىٰ لو أذاه قيس ما چان يريد يملك ليلىٰ هو چان يريد يعيشها و الفرق چبير بين الإثنين أكو ناس تحب حتىٰ تتزوج وأكو ناس تحب حتىٰ تتغير وأكو ناس مثل قيس تحب حتىٰ تصير هيَّ الحب نفسه أكو ناس تگول الحرمان سوىٰ بقيس هيچ بس تدرون شنو ؟ الحرمان ما يصنع هذا الجنون … الحرمان يكشف شگد الشي چان حقيقي إللي يحب نص حب ينسىٰ بسرعة و إللي يحب بكامل روحه يبقىٰ شايل الأثر حتىٰ لو الزمن تغير أما إحنة إختارينا الأمان بس مرات هذا الأمان يكون اهدأ من اللازم يمكن المشكلة مو بقيس … يمكن المشكلة إنه هو تجرأ يعيش إحساس إحنا بس نحلم نعيشه و يمكن كل واحد بينا عنده ليلىٰ يحاول يقنع نفسه إنه نساها .
4
1
