ဒေါ်အောင်ဆန်းစုကြည် အသံဖိုင်တု AI နဲ့ ဖန်တီးဖြန့်ဝေနေလို့ စစ်အုပ်စုရဲ့ စိတ်ဓာတ်စစ်ဆင်ရေးကို သတိထားဖို့ NUG တာဝန်ရှိသူ ပြော
ဩဂုတ် ၂၃၊ ၂၀၂၆။ ထားမြတ်/People’s Spring
လက်နက်ကိုင်တော်လှန်ရေးကို လက်မခံဟုပြောဆိုထားတဲ့ လူထူခေါင်းဆောင် ဒေါ်အောင်ဆန်းစုကြည်ရဲ့ အသံဖိုင်တု ထွက်ပေါ်လာတာနဲ့ပတ်သက်ပြီး အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က သတိပေးချက်တရပ် လူမှုကွန်ရက်ကနေ ပြန်လည်ရေးသားခဲ့ပြီး ပြည်သူတွေအနေနဲ့ စစ်အုပ်စုရဲ့ စိတ်ဓာတ်စစ်ဆင်ရေးကို သတိထားဖို့ သတိပေးလိုက်ပါတယ်။
မနေ့က ဩဂုတ် ၂၂ရက်ကတည်းက အဲဒီ အသံဖိုင်ဟာ လူမှုကွန်ရက်မှာ ဖြန့်ဝေမှုတွေ ပြုလုပ်နေတာဖြစ်ပြီး အဲဒါဟာ ဒေါ်အောင်ဆန်းစုကြည် အသံကို AIနဲ့ အတု ပြုလုပ်ထားတဲ့ ဖိုင်ဖြစ်တယ်လို့ ဦးနေဘုန်းလတ်က ပြောပါတယ်။
“ PDF တွေရဲ့လက်နက်ကိုင်တော်လှန်ရေးကို အန်တီကလက်မခံဘူးဆိုတဲ့ သဘောမျိုး ပြောထားတဲ့ အသံဖိုင်အတုပါ။ နည်းပညာနဲ့ သိပ်မစိမ်းသူတွေအတွက် အတုမှန်း အလွယ်တကူသိနိုင်ပေမယ့် နည်းပညာနဲ့ နည်းနည်းအလှမ်းဝေးတဲ့ သူအချို့ကတော့ အတုမှန်းမသိပဲ အစစ်လို့ထင်သွားတာမျိုးတွေဖြစ်နိုင်ပါတယ်။ ဖြန့်သူတွေ ဘက်ကလည်း ဒီလို target မျိုးကိုပဲ ရည်ရွယ်ပုံရပါတယ်။ အခုခေတ်မှာ ရုပ်သံတွေ၊ အသံတွေ အတုလုပ်ရတာ အရမ်းလွယ်လာတဲ့အတွက် အထူးသတိထားသင့်ပါတယ်” လို့ ဦးနေဘုန်းလတ်က ပြောပါတယ်။
ဒီလိုလုပ်တာဟာ PDF တွေရဲ့ အင်အားနဲ့ စိတ်ဓါတ်ကို ကြောက်ရွံ့လို့ စစ်အုပ်စုကိုယ်တိုင် မဖြိုခွဲနိုင်လို့ အားကိုးရှာတဲ့ သဘောဖြစ်တယ်လို့လည်း ဦးနေဘုန်းလတ်က ပြောပါတယ်။
“အန်တီ(ဒေါ်အောင်ဆန်းစုကြည်)ကသာ ဒီလိုတကယ်ပြောခဲ့တယ် ဆိုရင် အကြမ်းဖက်စစ်တပ်ဟာ သူတို့ရဲ့ ဝါဒဖြန့်ချန်နယ်တွေမှာ ထပ်ခါထပ်ခါလွှင့်နေမှာသေချာပါတယ်။ အန်တီ့ရဲ့ အရှိန်အဝါနဲ့ ဩဇာလွှမ်းမိုးမှုကို အကြမ်းဖက်စစ်တပ်က နားလည်ပြီး သူတို့အကျိုးအတွက် အသုံးချနိုင်ဖို့ ကြိုးစားနေတဲ့ သဘောကိုမြင်ရပါတယ်။ ပြည်သူတွေ၊ PDF လူငယ်တွေအနေနဲ့ အကြမ်းဖက်စစ်တပ်ရဲ့ ဆိုက်ဝါးတွေကို သတိထားကြဖို့ဖြစ်ပါတယ်” လို့ ဦးနေဘုန်းလတ်က ပြောပါတယ်။
နည်းပညာတွေ တိုးတက်လာတဲ့အလျှောက် လူပုဂ္ဂိုလ်တဦးရဲ့ မူရင်းပြောဆိုထားတဲ့ အသံစစ်စစ် နမူနာအနည်းငယ် (သို့မဟုတ်) မိန့်ခွန်းဟောင်းတွေကို အသုံးပြုပြီး မူလပြောဆိုသူရဲ့ အသံထွက်၊ အသံဝါး၊ အသံနေအသံထားနဲ့ လေသံတို့အတိုင်း ပုံဖော်ပေးနိုင်တဲ့ အသံတုကို နည်းပညာအရ လုပ်ဆောင်နိုင်သလို ရုပ်သံဖိုင်၊ ဓာတ်ပုံဖိုင်တွေလည်း ဖန်တီးလို့ ရနေတာဖြစ်ပါတယ်။ အဲဒီလို နည်းပညာတွေကို အသုံးပြုပြီး ဝါဒဖြန့်တာတွေ၊ သတင်းအမှား ဖန်တီးတာ၊ ငွေကြေးလိမ်လည်တာတွေလည်း ရှိနေပါတယ်။
(ဒေါ်အောင်ဆန်းစုကြည်နဲ့ အပြည်ပြည်ဆိုင်ရာ ကြက်ခြေနီကော်မတီ (ICRC) မှ မြန်မာနိုင်ငံဆိုင်ရာ ဌာနနေကိုယ်စားလှယ်တို့ တွေ့ဆုံနေစဉ်။ ဓာတ်ပုံ - စစ်ကောင်စီ)
26
5
2
2
1
1August 23, 2026 2.5K 3
