دوو هاووڵاتی کورد خەڵک شار قەسرشیرین سەر وە پارێزگای کرماشان، وە ناوەیل «ئەبولفەزل ڕۆستەمی» و «عێرفان مورادی دەنگی»، لە لایەن لق یەکەم دادگای ئێنقلاب ئی شارەو هەرکامیان مەحکووم وە ٥ ساڵ زندان تەعزیری (سەرجەم ١٠ ساڵ زندان) کریان.
وەپەی ڕاپۆرت ڕێکخراو ماف مرۆڤ «هەنگاو»، ئی دوو هاووڵاتییە وە تۆمەت «گردەوبۊن و تەبانی ئەڕا ئەنجامدان تاوان دژ وە ئەمنییەت ناوخوەیی و دەرەکی» لە لایەن دەزگای قەزایی ڕژیمەو ئی حوکمە وەسەریان سەپیاگە و بڕیار دادگا وە فەرمی وەپێیان ئێعلام کریاس.
دانیشتن دادگای سەرڕەسیکردن وە تۆمەتەگان ئی دوو هاووڵاتییە، مانگ گەلاوێژ ئیمساڵ لە لق ۱ دادگای ئێنقلاب قەسرشیرین وەڕێوە چۊ.
ئەبولفەزل ڕۆستەمی و عێرفان مورادی دەنگی لە ڕووژ پەنجشەممە ٧ زەردان ١٤٠٥ (٢٨ مەی ٢٠٢٦) لە پەیوەندی وەگەرد ناڕەزایەتییە سەرتاسەرییەگان وەفران ١٤٠٤، لە لایەن هێزەیل سازمان ئێتلاعات سپای پاسداران لە قەسرشیرین گیریاۊن.
ئی دوو هاووڵاتییە دۊیای چەن هەفتە دەسوەسەربۊن، لێپرسینەوە و شکەنجەی سەخت جەسەیی و دەرۊنی، وە نایین گرەویی وە شێوەی وەختی تا کووتایی قۆناغەیل دادڕەسی ئازاد کریاین.
PDKI_Media
