بەهای دۆلاری ئەمریکا لە بازاڕی ئازادی ئێراندا ڕێکۆردێکی نوێی تۆمار کرد و گەیشتە ٢٢٥ هەزار تمەن؛ ڕەوتێک کە هاوکات لەگەڵ توندبوونەوەی گەمارۆ ئابوورییەکانی واشنگتۆن، گوشاری لەسەر تاران قورستر کردووە.
لە سەرەتای مامەڵەکانی ڕۆژی شەممەدا، بەهای دۆلاری ئازاد گەیشتە ٢٢٥ هەزار تمەن و حەواڵەی دۆلاریش گەیشتە ٢٢٩ هەزار تمەن.
لە هەمان کاتدا، پۆندی بریتانیا بە ۳۰٥ هەزار تمەن و سکەی ئیمامی بە ۲۳٥ ملیۆن تمەن مامەڵەیان پێوە کرا.
ئەم بازدانە بێوێنەیە گەشەیەکی نزیکەی ٩٪ی بەراورد بە سەرەتای حەفتەی ڕابردوو نیشان دەدات و جیاوازیی نرخی دۆلاری ئازاد لەگەڵ ناوەندی ئاڵوگۆڕی دراو بۆ زیاتر لە ٦٤ هەزار تمەن بەرز بووەتەوە.
ئەم بەرزبوونەوەیە دوای ئەوە هات کە ئەمریکا بانکێکی تورکیە و دوو شیرکەتی ژێردەستەی بەهۆی هاوکاریی دارایی بۆ هێزی قودسی سپای تێرۆرستی پاسداران سزا دا.
سکات بیسێنت، وەزیری خەزێنەداریی ئەمریکا هۆشداریی دا کە کەرتەکانی فڕۆکەوانی، کەشتیوانی و سەرمایەی دیجیتاڵیی ئێرانیش دەبنە ئامانجی قۆناغەکانی داهاتووی گوشارەکان.
ماڵپەڕی فەرمیی حیزبی دێموکراتی کوردستانی ئێران:
https://kurdistanmedia.com/
PDKI_Media
