بخصوص الدكاتره، بالمجمل الدكاتره كويسين، وقليل اللي شرحهم مو واضح واذا جاء شرحه مو واضح تكون سلايداته واضحه الحمدلله، واذا جاء مو واضح بالسلايدات تلقاه واضح بالشرح، نادر يكون فيه دكتور سيء بالاثنين كلهم، هنا بتكلم عن الدكاتره واساميهم بحيث تاخذون فكرة عن الدكتور وهذا بيساعدكم ان شاء الله. - الكلام عن الدكاتره اللي واجهتهم شخصيًا - رأيي عن الدكتور بالغالب بيختلف معي فيه اكثر من طالب درس عنده، وهذا طبيعي لكن اقل شيء بكون قربت لك الصوره تقريبًا عن الدكتور. - حامد سالم جاد المولى محمد : دكتور يدرس وظائف الاعضاء بشكل عام، اي جزئيه خاصه لوظائف الاعضاء احتمال يدرسكم فيها، الدكتور بالشرح ممتاز جدًا وبالسلايدات ممتاز، اختباراته ذكيه مافيها تركات زي مايقولون غالبية الطلاب لكن لازم تذاكر كل شيء لانه يسأل عن كل شيء تقريبًا، الدكتور مُلم بالمنهج والمجال حقه بشكل كبير جدًا، صراحةً انا اعتبره افضل دكتور موجود عندنا بالكلية، بيقول لكم ارجعوا للكتب والمصادر اللي بينزلها بالبلاك بورد لانه بيجيب منها بالاختبارات، صراحةً انا ماقد رجعت وكان يجيب بالاختبارات سؤال عليه ربع او نص درجه من الكتاب فقط، واذا كنت مذاكر كويس بتقدر تحاول على الاقل انك تجاوب، الدكتور بالدرجات يدف يعني يعطيك درجات من عنده، الدرجات عنده لا تشيل همها دايم يحاول يعطي، واهم شيء اذا شاف الكلاس كامل يتفاعل معاه هو ينبسط ويتساهل معاكم ان شاء الله، احتمال يغدر فيكم باختبار من اختباراته لذلك انتبهوا وذاكروا ياجماعه مهما كان سهولة اللي هو محدده للاختبار، وتراه من نوعية الدكاتره الاذكياء لا تحاول تستذكي عليه بمعنى لا تتأخر وتقول كنت وكنت وكنت وكنت، قول الحقيقه بس، سبق ودرسنا اساسيات وظائف الاعضاء بالترم الاول، والترم الثاني درسنا بجزئية الوظائف بمواد تشريح ووظائف اعضاء العين وعلم الاعصاب، حشو السلايدات وسط. - يحيى مكي بشارة : دكتور يدرس التشريح، اي جزئيه من اي منهج يجيك فيه تشريح، فاحتمال كبير انه بيدرسك فيها، درسنا اساسيات التشريح بالترم الاول ثم بالثاني درسنا جزئية التشريح في مواد تشريح ووظائف اعضاء العين وعلم الاعصاب، الدكتور شرحه يمكن ماتفهمه، كلامه ولهجته مو واضحه مره، لكن سلايداته جيده ماهي سيئه، بالاختبارات يمكن يغدر فيكم كثير ويجيب اسئله ماتنفهم اصلًا وصعبه لذلك انتبهوا منه، واحتمال يقول لكم ذاكروا كذا ثم يجي الاختبار تحصلونه ماجاب اللي قالكم ذاكروه، جاب شيء مخالف له تمامًا، هذا غير انه مرات يمكن يحدد لكم اللي معكم بالاختبار وتتفاجئون انه بالاختبار جايب شيء زياده عن التحديد، لكن ميزته انك لو تسأله عن شيء لوحدك فالدكتور مبدع مبدع مبدع مبدع مبدع جدًا، مايشرح كويس للمجموعه لكن اذا جيت تبيه يوضح اكثر فهو ممتاز جدًا، نفس حامد بيقول لكم ذاكروا الكتاب لكن نفسه برضو مايجيب، المجسمات اللي موجوده عنده جدًا ممتازه في توضيح المعلومات اللي هو يقولها لذلك استعينوا فيها وبعد ماتخلص المحاضره عادي اقعد عنده واسأله وخله يوضح لك بالمجسمات نفسها، مجسماته توضح لك جزئيه كبيره من المنهج وتخليها سهله بالنسبه لك، والدكتور يدف دف مو طبيعي لذلك حاولوا ماتزعلونه وخلوه رايق دايم لا يعصب عليكم، ولا تسألونه اسئله غبيه، ويحشي السلايدات حشي كثير. - نواف المطيري : دكتور سعودي ممتاز صراحةً في الشرح والسلايدات حقته وسط، تحتاج شرحه كامل عشان تفهم السلايد، الدكتور متساهل جدًا مع الطلاب ومخليهم براحتهم وحبيب لاقصى درجه، اختباراته جيده مرات يصعبه تكه ومرات يكون سهل، بيدرسكم في البصريات الفيزيائيه والبصريات الهندسيه في اول سنة، اهم شيء ركز معه بالشرح ولا تفوت محاضراته لانه يبني كثير على اللي بالسابق، سلايداته اذا قدرت تفهمها فأنت اختصرت على نفسك درب طويل لانها دايم صغيره وبسيطه، الشابتر مايتعدى ٢٠ سلايد دايمًا، الفكرة اللي بيشرحها بسيطه، لكن خلك مركز معه عشان يوصلها لك وهي بسيطه، لان اذا فهيت شوي يمكن تصير اصعب بكثير من اللي تتصوره. - ونيان الونيان : دكتور شرحه وسط وسلايداته ممتازه، اختباراته كانت وسط برضو، بيدرسكم مادة الكيمياء في العلوم الصحيه بس، وهي اعادة لمنهج التحضيري. - عارف : دكتور باكستاني بيدرسكم مادة اساسيات الوراثه جزئية العملي فيها، الدكتور شرحه وسط، شديد بالنظام، لا تخلونه يتنرفز لان لو تنرفز احتمال يولع فيكم، سلايداته جيده، اختبار الفاينل اسئلته كلها من اوراق العمل اللي تجي مع الشابترات، لذلك لازم تحلونها كويس جدًا، واجوبتكم تكون صح.
5
