قصائد ملا مسلم الوائلي️ مكتوبه: post #1663 — TG.ME

📜 القصيدة: جيتك مهضومة 🎤 أداء: مسلم الوائلي 🖋 كلمات: ابو فايز الرافضي ~~~~~ وليك جينه خويه يا ابو سكينه ~ راجعتلك وانه گلبي ايحن عليك گوم خويه الأختك تلگاها .. وليك جينه خويه يا ابو سكينه حته لو تعبانه من الضيم اجيك انه هاي التعثر بممشاها .. وليك جينه خويه يا ابو سكينه يالنعشك حصيره وموش تابوت ارد انعه لحد ما ينبح الصوت اجيتك وبدليلي هواي حسرات يالبعدك بگيت بحسرة الموت (خويه اگعد جيتك مهضومه) ~~~ من بعد ضيم السبي وذاك الضياع راجعه بلايه رقيه وحايره .. وليك جينه خويه يا ابو سكينه شايله همومي مثل شيلت متاع وروحي من الفرگه مدري شصايره .. وليك جينه خويه يا ابو سكينه فز من الگبر يالشابع جروح يمحيرني بعدك وين ما اروح تستاهل عليك اطيح المتون اريد الطم لحد ما تطلع الروح (تستاهل عيني ومي عيني) ~~~ امنيتي سالم الگه طولك لو اجيت واگعد وياك وتفرفح روحي .. وليك جينه خويه يا ابو سكينه راجعه بلوعه ومثل سعفه انحنيت مالت امتوني وثگيله جروحي .. وليك جينه خويه يا ابو سكينه يالميت عطش ما ضايگ الماي مشتاگتلك ابگد عطرك هواي محتاره شگلك يا ضوه العين من تسألني بنتك ما اجت وياي (بالشام بنيتك مدفونه) ~~~~ شوف حالي شصاير وحال البنات والعيون من المدامع سابحه .. وليك جينه خويه يا ابو سكينه الجانن بظلك يغالي امدللات هسه يقرن عالمحنه الفاتحه .. وليك جينه خويه يا ابو سكينه تحزمنه اعله گبرك واللطم صار حار وتسوه يبن امي البجي الحار راح اگضي العمر بس الطم عليك حزن اختك يضل مهما الزمن دار (يالخوتك بيش انجازيها) ~~~ شرد اسولفلك عله البيه انه صار وداعت عيون الحسن تعبانه .. وليك جينه خويه يا ابو سكينه لسه من الخيمه احس بگلبي نار لسه اختك تركض وحيرانه .. وليك جينه خويه يا ابو سكينه يا ضيمي وبلوتي وشيبت الراس بس انه اختلف عن باقي الناس رديت بوجع وبحضني اثنين راس حسين اخوي وراس عباس (خويه من فراگك تعبانه) °°°°°°°°°°°°°°°°°°°°°°°°°°°°°°°°°°°