نصيحة للامهات ..خاصة امهات طلاب الصف الاول
بعد شهر تقريبا او اكثر للمدرسة ..
علمو اطفالكم شلون يلمون دفاترهم و كتبهم و شلون يضموهم بالجنطة سوي الهم تدريبات بالبيت.
المحفظة خلو بيها قلمين رصاص و مقطاطه و مساحه عادية نصيحة الكم بدون هذه الاشكال المتوفره بالاسواق بيها فيكات و مقطاطه جبير لو مساحه جبيرة و مدري شلونهم علموهم على البساطة و نفس الوقت تحبون تشترون الهم شي بي فيكه اشترو بس خلو بالبيت لا ياخذونه للمدرسة ..
السبب الاول الطفل من يتعلم على اغراض بسيطه راح يتعامل وياها بساطة و ما يهتم للمظاهر ..
السبب الثاني سهولة حفظها بالمحفظه ..
من يضيعون اغراضة ما راح ينقهر لان بكل سهوله اكو بديل مقطاطه مساحة عادية ..
اذكرلكم موقف شفته كدامي ((ام ل طفلة يوميآ تجي تشتكي للمدرسة بنتي انباكت مساحاها شكلها هيج لونها هيج بنتي اغراضها مميزة و لهذا تنسرق و من هل سوالف ))
زين المعلمة هم خطية المن تصير ؟
تكعد تحرس محفظات الاطفال ؟
لو تكعد ترضي الطفلة على اغراضها الي ضاعت ؟
جديات بدايه المدرسة الطفل تشوفونه حيل راح يتأثر بهيج امور اذا ضاعت او انسرقت راح ينقهر و يجبركم تجيبون بعد ..
يجوز تشوفون اني ابالغ بالسالفة بس من تصير وياكم راح تذكرون كلامي ..
نصيحة لخ ...الطفل من هل ايام علمو يلزم القلم و يكتب اذا ما عرف ..علمو بهل طريقة ((بأصباغ خشبية كتبو الحروف له بورقه كامله و هو يكتب فوكها مدة 3 ايام على هل نمط نمشي رابع يوم ذاتيا تشوفو عرف رسمة الحرف ))
سالفة التواليت ...كل طفل خلو عنده صابون ورقي كلش حلو هل اختراع مجان بزمانه موجود .
موضوع الاكل(( راح تعانون منه هووواي ))
اكو امهات ينطون للأطفالهم فلوس فقط و هو ما متريك و يروح للمدرسة يشتري جبس لو مدري شنو ..المهم يبقه جوعان ..
الام كل ظنها هو اكل شي زين و شبع بس هي متعرف ان اكو فئة من هل اطفال مو كلهم و احدد اكو فئة ياكلون اكل طلاب غيرهم ..
و حتى سرقات تصير بالاكل ..
انطوهم اكل و فلوس لا تنطون بس فلوس ..
علمو اطفالكم لا ينطون اكل ابد لا تكولون الهم انطو لـ صديقاتكم اكل ((اكو ناس راح تشوفني ما احب الخير بهل سالفة ))بس ابد ابد لا تعلموهم ينطون و يشاركون اكلهم
ليش ؟
السبب راح الاطفال البقية تستغلهم و يبقون يجبروهم ينطون الاكل و اذا ما انطو اكل راح يزاعلهم و يصيرون عصابات على الطفل ..
ف اختصرو الموضوع و من الاول منعو اطفالكم يتشاركون الاكل و ينطون اصدقائهم.
بالتوفيق للجميع
36
11
3
3August 22, 2026 1.2K 4
