•{نبض گلبي محرم}•
ما ريد أضيع و أنحرم مأتمه
عاشور إجه سجليني يا فاطمه
ثبتي إليّه قدم...بالمجلس و يالخدم
عاشور إجه سجليني يا فاطمه
١/ صخرة بلال اعلى الصدر مرت عليْ الايام
موعد محرم أنتظر يوصلني طول العام
عيني على الساعة مثل عين الگمر لحسين
يمتى أردّ لموكبي يمتى أشد احزام
شهور أتاني...محرم ليلة
عظيم شعوري...بحروف الحب قليلة
عزيز عليّه...وعلاقتنا طويله
أموت بدونه...دخيل الله و دخيله
منّ الطفولة و آنه احب خدمته
من گمّطتني الوالده برايته
متعود أرفع علم...بالمجلس ويالخدم
عاشور إجه سجليني يا فاطمه
٢/ حضّرته ثوب الأسود و جيت بگلب مكسور
شگد حلوه من بعد التعب من أسمع ال مأجور
ما بين قوسين اكتبت جمله لجميع الناس
(ما الحب الا للحبيب الأوّلي عاشور)
أسير ملكني...و انه بِحروفه مُغرم
حرام أعوفه...و اخونِ الحبِّ الأعظم
طبيب جُروحي...و أبد ما غيره يِرهم
اختصار كلامي...نبض گلبي محرم
حظ و بخت أحچي و أبد ما أضم
عايش على الله و عايش اعلى اللطم
أجمل لقاء انرسم...بالمجلس ويالخدم
عاشور إجه سجليني يا فاطمه
٣/ رفرف دليلي امن اسمعت گالوا محرم جاي
مثل الحمامه النكتت جناح الها ناگع ماي
يا فاطمه الدمعه رزق لوليدچ المذبوح
ما أطمع أكثر بالرزق منّچ ردت بس هاي
دموع عيوني...بمحرم من أهِلها
أمير كأني...و ملكت الدنيا كلها
جمال حسيني...المجالس ما مثلها
بصريح العباره...كبر صيتي بفضلها
لو ما دمعتي التجري منّ الجفن
ما عندي قيمة و لا إليّه وزن
و اتمنى كون أبچي دم...بالمجلس ويالخدم
عاشور إجه سجليني يا فاطمه
٤/ شديته بالحضره العلگ يم الگمر عباس
و گتله دخيلك سيدي يا صاحب النوماس
ما رايد امن الدنيا بس خدمة أخوك حسين
الخدمه ذِلّه و خدمة حسين التشيل الراس
دخيل چفوفك...أنا چفوفي گصيره
إجيت و اريدك...تحط براسي غيرة
أريد أنادي...بهالحچايه الچبيره
الحسين خِدَمته...بفضِل بدر العشيره
قاضي الحوائج يا كفيل الخدر
مو صعبه للمثلي تسهّل أمر
لا ما أشوف الندم...بالمجلس ويالخدم
عاشور إجه سجليني يا فاطمه
٥/ المهدي يم باب العزه و لابس ثيابه السود
خايف يدورني السنه و يلگاني ما موجود
ما أنصر المهدي إذا ما أخدم بعاشور
أهل المجالس تنحسب عند الإمام جنود
رضاچ عليه...يمولاتي ضماني
جواز عبوري...لگلب صاحب زماني
بعزاء محرم...أريد أحجز مكاني
دخيل إمامي...لَيِستَبدلني ثاني
لو ما حضرت بهالسنه للعزه
بجيش الإمام امچاني ما أحجزه
واجب حضوري نعم...بالمجلس ويالخدم
عاشور إجه سجليني يا فاطمه
*الشاعر الموفق ياسر المطوري*
رابط قصيدة "نبض گلبي محرم":
https://youtu.be/aASjkbpqfbM?si=I98CFrn1X7t0woHR
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
YouTube
نبض كلبي محرم | #مصطفى_السوداني |(حظرته ثوبي الاسود)
#الرادود_مصطفى_السوداني
#مصطفى_السوداني
احبتي الأعزاء
اشتراككم في القناة دعم لنا دائم بتقديم الأفضل للحسين عليه السلام
اشترك بالقناة وفعّل التنبيهات
🔘قصيدة :- نبض كلبي محرم
🔘أداء الرادود :-#مصطفى_السوداني
🔘كلمات الشاعر :- ياسر المطوري
🔘مونتاج /صاحب باسم…
June 8, 2026 4.9K 56
