̲2̲/̲4̲: post #2575 — TG.ME

مرات الإنسان يوصل مرحلة بحياته ما يعرف وين واكف بالضبط، لا هو مكمل ولا هو منتهي. واكف بنص الطريق وكل شي حواليه معلق؛ علاقاته، قراراته، حتى أحلامه معلقة. هاي الحالة يسموها "النهايات المعلقة"، مو فشل ولا ضعف، هي حالة ارتباك داخلي تصير لما ما نعرف شنريد. الوجع الحقيقي مو بالقرار الغلط، الوجع أن تبقى معلق. والإنسان نفسياً لما يعيش حالة من الانتظار الطويل، يستنزف روحه بدون ما يحس. فتشوف شخص باقي بعلاقة غلط بس يخاف ينهيها، أو شخص يكره عمله بس يخاف يتركه، أو واحد يعرف قراره صح بس يظل يأجل بي بحجة أن الوقت غير مناسب. فتشوف يفقد تركيزه، تضعف ثقته بنفسه، ويحس أنه واكف بمكانه والعالم دتمشي، ويصير عنده قلق وتعب داخلي وتردد بكل شي. والسؤال: أحنا ليش هيج نصير؟ الجواب أن أحنا نخاف نخطأ، نخاف نندم، نخاف نخسر، فنختار أسهل طريق وهو أن "ما نختار". بس الحقيقة المؤلمة أن الـ "لا قرار" هو قرار بحد ذاته، وأن الانتظار الطويل يستهلكنا أكثر من أي خسارة. أصعب شي أنك تظل تنتظر إشارة، وقلبك يعرف الحقيقة بس يخاف يعترف بيها، فتظل تأجل الخطوات بسبب الخوف والتردد. النهايات المعلقة تعلمك درس واحد: أما تكمل الطريق أو تختار غيره، بس لا تبقى واكف لأن الحياة ما تحب المترددين. بالنهاية، ماكو شي يقتل الروح أكثر من باب نصف مفتوح، قلبك بعده ينتظر شي ما يجي أبداً. اختار حتى لو كان الاختيار صعب، لأن الراحة تجي بعد الحسم مو قبله.