٣ ـ كلية الصيدلة
كلية صيدلة حاليا عبارة عن 5 سنوات دراسة + سنة امتياز
طبعا النظام الجديد دلوقتي كل الصيادلة حاليا بقوا كلينكال لكن لسه ثقافة الصيدلة الكلينكال في مصر محدودة شويه و مش مفعلة و كذلك شغل التصنيع الدوائي الي اغلب دراسة طلبة صيدلة متعلقة بيه قليل جدا الي بيشتغلوا فيه و الاغلب بيشتغل في الصيدليات او في تسويق الادوية وهكذا
المشكلة الي بتواجه طلبة صيدلة بالتحديد هي زيادة الاعداد المهولة الي بقالها فترة طويلة و بناء عليه التكليف الحكومي حاليا التكليف هيتلغي بداية من الدفعة الجديدة فدي مشكله كبيره
ثانيا وجود كم هايل من الدخلاء الي بيشتغلوا في الصيدليات او في تسويق الادوية و ساعات بيتفضلوا عن الصيادلة علشان ارخص في الاغلب فده مخلي طلبة جدد كتير مش عارفين يشتغلوا
من ناحية تانية شغل الصيدليات فيه مشكلة حاليا لانه في قانون ان فيه مسافة 100 كتر بين كل صيدلية و التانية فاغلب الاماكن المميزة الي فيها تكتلات سكنية فيها صيدليات قديمة مغطية المساحة بالفعل مم ناحية تانية الربح في الادوية قليل و محدد من قبل الدولة لحد هنا الدنيا كانت ماشية لبعض الصيادلة لكن دخول سلاسل الادوية برأس المال العملاق بتاعها و انها عملت خصومات كبيرة و توصيل ببلاش خسر الصيدليات الفردية كتير
مؤخرا برضو فرص العمل في الخليج بتتضائل نتيجة السعودة و الناس دي كلها بدأت تنزل مصر فصدقا مجال الصيدلة مش احسن حاجة حد ممكن يدخلها دلوقتي الا لو معاه راس مال عملاق او هيورث بيزنس العائلة في الصيدلة
٤ - كلية العلاج طبيعي
من الكليات الناشئة و الصاعدة بقوة حاليا ، 5 سنوات دراسة و سنة أمتياز
المشكلة الي بتواجه كلية علاج طبيعي ان لسه الثقافة بتاعته منتشرتش حتي في وسط الدكاترة قبل الشعب نفسه والمجتمع و بناء عليه أغلب دكاترة العلاج الطبيعي شغالين علي التخسيس و التغذية و غيره و ده حقيقي تقليل من شأن المجال بس الموضوع محتاج شوية وقت و الثقافة هتنتشر والموضوع مع مرور الوقت سيختلف تماما
أغلب المجال شغالين مراكز مش عيادات لأنه لازم يكون فيه أجهزة و أدوات و بتكلف ماديا حقيقة بس اقل من تكاليف الاسنان طبعا خصوصا ان مافيش مستهلكات كتيره
الميزة في شغل العلاج الطبيعي ان المريض بيحتاج جلسات كتير متتابعة فانتا مش محتاج مرضي كتير علشان تشتغل كويس
بس المشكلة الي بيواجهها اطباء العلاج الطبيعي ان طلبة تربية رياضية بياخدوا شهادات وهمية و بيشتغلوا كعلاج طبيعي و بيبقوا مقتنعين اصلا انهم مؤهلين للشغل ده و ده من حقهم فللأمانة لو محلوش المشكلة دي في الكام سنة الي جاية فوضعهم هيبقي زي الصيادلة
فرص السفر كويسة شوية أحسن من أسنان بس أقل من بشري
و وضعهم زي أسنان كدا الي بتتعلمه في الكلية هو الي هتمارسه و تراك قصير بتبدأ شغل بعد التخرج علطول و التخصصات مش محتاجة دراسات عليا فالدنيا كويسة الي حد ما
٥ - كلية تمريض
عبارة عن 4 سنين دراسة و سنة واحده امتياز
أول حاجة انت محتاج تدركها عن كلية تمريض هو ان كلية تمريض بتخرج أخصائي تمريض الي هو بيشرف علي التمريض او بيرئسهم و بيشتغل في الحاجات المهمة
الممرضين نفسهم بيبقوا خريجين معهد فني تمريض سنتين
أخصائي التمريض بيقدر ياخد تخصصات زي ( نسا و ولادة - جراحة - عناية مركزة ) الخ و بيبقوا مطلوبين جدا في مصر و برا مصر و فرص سفرهم سهلة و مرتباتهم كويسة جدا
و لكن هي المشكلة هنا انه مفيش نمو وظيفي حقيقي ياعني انتا هتفضل ممرض طول عمرك حتي لو اخدت تخصص فدورك برضو هو مساعدة الدكتور ليس الا و متقدرش تفتح شغل لنفسك طبعا
ده غير السمعة السيئة الي عاملها الاعلام و المجتمع عن التمريض و يمكن دي أسوأ حاجة موجودة
طبعا نقطة واجب طب التنويه عنها ان معاهد التمريض الخاصة الاي كلام دي بتخرج مساعد ممرض و مرتباتهم و شغلهم زي الزفت و دي مختلفة تماما عن كلية تمريض
أخيرا ايا كان مجالك دي شوية نصائح ليك 🤍
- لو ليك اهل و قرايب شغالين في مجال معين هتبقي فرصة كويسة انك تتعلم منهم و تشتغل معاهم و هيختصروا عليك وقت و جهد كبير
- اي كانت كليتك لازم تحدد اولوياتك و هدفك ؟
لو انتا عايز تتعين في الجامعة فاهم حاجة بالنسبالك هتكون الدرجات و الترتيب
لو انتا عايز تسافر هتذاكر لغة او معادلة و تجيب فلوس علشان تعرف تسافر
لو انتا عايز تتعلم بشكل عملي انزل اتدرب و اتفرج علي الواقع بس اوعي تشتغل بفلوس غير لما تكون مؤهل عمليا و قانونا و جيب درجات كويسة برضو
لو انتا مش عارف انتا عايز ايه حاول تستكشف مجالك بسرعة علشان تعرف ايه الي يناسبك و متضيعش وقتك
في النهايه لازم تحاول تتميز في شغلك بتخصصك النادر أو شطارتك فيه أو ادواتك أو دعايتك ولازم تتعلم بيزنس و ادارة و علشان تعرف تعيش حياتك كويس و لازم تفضل تتعلم كل حاجة جديدة في مجالك
By: Dr Islam Omar
#AL_MIG
○ To see all our references and contact us
----------> https://linktr.ee/AL.MIG
3February 15, 2026 332
