Hesham's Notes: post #496 — TG.ME

HEHesham's Notes@HeshamNotes · 5.5K subscribersOpen in TelegramOpen

📍Your Ultimate Guide to be a
good medical intern (part 6)👇

● شوية Ground Rules كده نتعامل بيهم في الاستقبال:

👈 في النبطشية، بنيجي قبل معاد البصمة بحوالي (ربع - نص ساعة) عشان نلحق البصمة من ناحية، و عشان نقسم السراير و نستلم الحالات كويس من اللي قبلنا و منأخرهمش.

👈 نراعي في التقسيم حالات الحجز، و دي الحالات اللي بتبقى خلصت كل حاجة و مستنية سرير يفضى في القسم عشان تطلع تتحجز، ف نقسم الحالات دي على بعض عشان ميبقاش حد سرايره كلها حجز فميشتغلش و التاني سرايره كلها حالات فيبقى مضغوط.

👈 لما نستلم حالة، نخلي زميلنا اللي سلمهالنا ييجي قدام الحالة يعرفهم إن الشيفت بتاعه خلص، و إن زميله الدكتور فلان هيتابع معاها، دي حاجة بروفشنال و هتكبرك انت و زميلك في نظر العيان.

👈 لما أدخل على حالة، أسلم عليها و أعرفها بنفسي .. أنا دكتور فلان و هتابع حالتك .. عشان بعد كده لو احتاجك يسأل عليك باسمك، ميقولش لزمايلك الدكتور أبو نضارة اللي كان لابس اسود و خلافه ..

👈 مينفعش بأي حال من الأحوال، أدخل مع زميلي و هو بياخد هيستوري أو بيفيتل أو بيعمل exam للحالة و أتكلم و أعدل عليه قدام الحالة .. دي قلة تقدير لزميلك و بيخليه يسقط من نظر الحالة .. لو عندي تعديل، بسكت خالص لحد ما نخرج أنا و هو بعيد عن الحالة و أكلمه فيه ..

👈 مينفعش برضه أحضر نبطشية مش نبطشيتي من غير ما استأذن ليدر الجروب أو شخص أعرفه في الجروب، و أخد permission منه إني أحضر معاهم سواء كobserver أو أشتغل و أشيل سرير، و يُستحسن نسيب الناس في أول كل سايكل يشتغلو لوحدهم على ما يتعودو على الشغل و بعد كده نستأذنهم و نحضر معاهم ..

👈 اتصل بالنايب مرة و اتنين، لو مردش و الحالة طوارئ متستناش، روح للمشرف خليه يتصلك عليه.. لو مردش على المشرف هو تلقائي هيعمل call عليه.

👈 لو هتسيب الاستقبال و تروح تصلي أو تعمل حاجة، حاول تختار وقت مناسب و سلم الحالة لزميلك و عرفه عملت ايه و مستني إيه، بحيث لو الحالة احتاجتك هو يتصرف على ما انت ما تيجي. لو معملتش كده، أول ما الحالة ما تسأله عليك هيتصل بيك عشان تجيلها.

👈 الحالة السايكك يا شباب نتعامل معاها كويس و هتلاقو شرح إزاي نتعامل معاها في الرسالة دي:
https://t.me/HeshamNotes/486

👈 لو في حالة دخلت في Arrest، طالما حالتك مش خطيرة لدرجة إنها تدخل في arrest، سيب اللي في إيدك و روح اشتغل على الحالة.. لو لقيت عدد كافي هناك ابقى ارجع لحالتك.

👈 أكبر مشكلة هتقابلك في الاستقبال هي عدم وجود سراير فاضية للحالات، و الحالات هتيجي تشتكيلك و يتخانقو معاك. كلمهم بالذوق و اشرحلهم الوضع، و لو حالة كبيرة قعدها على كرسي، و لو مستجابوش قولهم يروحو للمشرف.

👈 لو حالة ملهاش سرير، ممكن تاخد history و vitals لو الاستقبال فيه مجال لده على ما سرير يفضى، و لو حالة تعبانة أوي و serious ممكن تستأذن حالة انك تكشف على سريرها و ترجعها تاني (لو هتعملها ECG مثلًا)

👈 الريلاتيف بيبقى جي مشحون عشان شاكك في الخدمة الطبية اللي بتتقدم و ملهوف على الحالة اللي معاه، قدر ده و لو لقيت ريلاتيف بيزعق روح شوف الحالة اللي معاه قاعدة على أنهي سرير و خليه يجيب تذكرة استقبال و على ما ييجي شوف السرير ده مع مين من الدكاترة و عرفه إن عليه حالة، أو لو انت فاضي نسبيًا اشتغل الحالة خصوصًا لو خطيرة.. و معظم الريلاتيفز مجرد ما تشتغل حالتهم بيهدو و يعتذرو على عصبيتهم ..

👈 تحملك لعصبية الريلاتيف بحدود برضه، أي تطاول عليك متسكتش عليه، و عرف الريلاتيف يتكلم كويس و لو الكلام مجابش نتيجة، روح قول للمشرف و هو هيتصرف معاهم أو خلي الأمن يجيلهم.

👈 الحالات نبلعلها مرة و اتنين و تلاتة لو كانو عصبيين، نستحملهم أكتر من الريلاتيف .. و لو حالة اتعصبت عليك كلمها بالراحة و عرفها إيه اللي في إيدك تعمله و إيه اللي في إيد الإدارة (زي إجراءات الحجز و خلافه)، لكن لو تطاولو عليك و الموضوع جه على كرامتك خد موقف ..

👈 نفس الكلام مع النواب، بنقدر إن النايب تحت ضغط شغل و ممكن يصدر منه كلام بعصبية أو نرفزة لكن لو تطاول عليك هو أو زميل ليك، كلمهم بعيد عن الحالة في إن ده مينفعش و أغلب النواب كويسين و مش قصدهم ..

👈 متشيلش شغل النايب، لو نايب قالك أنا طالع أنام و لو جت حالة اتصرف انت و متكلمنيش و خلافه متعملش كده و متتصرفش من دماغك .. الحالات مسؤوليته هو مش انت، ولو حالة missed منك و مشيتها و حصلها حاجة ذنبها في رقبتك ..

👈 متبصش بدونية لزميلك الأصغر منك، خصوصًا دفعتين الامتياز اللي مع بعض دلوقتي .. دفعة 6+1 مش أحسن من دفعة 5+2 في حاجة، انتو الاتنين امتياز .. ولو شايلين شغل مع بعض في النبطشية فكلكو سواسية و بتتعلمو مع بعض .. و زمايلكو الأصغر لما يقفو معاكم يتعلمو، طولو بالكم معاهم و اشرحولهم بتعملو ايه .. كلنا بنساعد بعض، و اللي بتعملو مع غيرك هيتردلك ..

t.me/HeshamNotes/496

9

6

March 14, 2024 4.6K 30