سەبەبێوەو بەڎبەختی هەن ئەچی ژیڤاینە، بە نامێو پژگیای. پێسەو نەفەرێوی سەڎ هەوڕێ دەسشۆ کەوتێبارە و گەرەکشبۆ هەر سەڎی جارێنە گێرۆوە و ئاخریچش یۆیچشا نەگێرۆوە.
پژگیای ئا چێوا گەرەکێمانێ هەم یۆی گێجنا، هەم خەفەتش مڎا پەنە. نیمەنە گێجیەی و سەرت وەنە شێویۆ، ئاخریچۆ پەی هەر نەیاوایێ خەفەتێوە وەری. ڕاش ئانێنە ئێنسان سەرقەلێ ئەسڵی گێرۆ و ماباقی چێوەکاتەریش پاڵو ئاڎینە گەرەکێبا. زێندەگیش پێسە قەتارێوی وزۆ سەروو ڕەیلێوی. چوون ڕاسەکێش ژیڤای ئێمە پێسنەو سفحێوی چەرمەی بێ نیشانەی نیا. ئێمە خۆ پێسنەو باعزێ مرۆچا نیەنمێ تلیێبێمێ ڕەنگۆ و سەرو بوومێوی زلیوە بیمێ و ڕاکێما هەروەرەنە شۆنیمارە وەشە بۆ. ئێمە ڕایێوەما هەنە کە مشۆ پاو ئاڎێ بلمێ وەرۆ و هەر چێوێتەریچما دلێو ئی ڕێنە گەرەک بۆ.
هەر سەیرانێو هەن، هەر وەشیێوتەر، هەر هەدەفێوە دەسە دوە مشۆ ئیسگایەکاو ئی قەتارینە، قەراخو ئی ڕەیلینە با. ماچا ئەپینەی: کەرەدەیوە یۆو دڵنیگەرانی یام کەردەیوە یۆو دڵ مەشغووڵی یام ئەسڵەن تۆ واچە کەردەیوە یۆو خەمی. چوون وەختێ خەمت یۆ بی شاڎیچت هەر ئانەنە. عەسڵەن مەتەرسەیچ، چوون ئی ڕەیلە پاڵوو فرێوە ئیسگایە زەریفارە ویەرۆ، دەشتێ سەوزێ، پردێ فرێ سەرو ڕۆخانە زلەزلارە و دەشتە خەلێو و شارێ وەشە وەشێ.
ــ عبدالله محمد
https://t.me/Hananeh1314
5September 4, 2026 89 1
