Ғанимларим қилар бўлса адолар Боғларимни пайхон этса гадолар Хар… — Bibirajab Abdulaziz || Hanafiy xonim

Bibirajab Abdulaziz || Hanafiy xonim@Hanafiyxonim · 463 subscribers Open in TelegramOpen

Ғанимларим қилар бўлса адолар
Боғларимни пайхон этса гадолар
Хар томондан ёғилсаям балолар
Яхшилигим билмаса юз қаролар

Ғамларимни олгувчи бир олам бор
Орангизда чиройлигим онам бор

Тоғлар кўрки баландлиги қоридан
Анор гулин гўзаллиги норидан
Борин тўксам юрагимнинг торидан
Кечиб бўлди бизлар учун боридан

Соғинчимни ёзгани шу қалам бор
Орангизда чиройлигим онам бор

Хаёлда хам қилмас асло хиёнат
Фидо бўлур балким ўшал қиёмат
Кўрябсизми балоланмай бу қомат
Гуллаябди барқ урябди саломат

Дуосидан жони қирқта танам бор
Орангизда чиройлигим онам бор

Асра Роббим малҳам бўлган ярамни
Менга қўшиб боқиб берган боламни
Кўз ўнгимда чўкиб қолган Ка’бамни
Хокисорим гул юзлигим онамни

Боғларига баҳор қўнган хонам бор
Орангизда чиройлигим онам бор

Юрагимни ёндирган бир алам бор
Кўз ёшлардан ивиб битган жолам бор
Армонларга тўлиб кетган нолам бор
Яхшиямки тўйларимда онам бор

Ғаниматим,дуогўйим соям бор
Орангизда чиройлигим онам бор