قسم الأمن السيبراني المنفوخ
بعد امتحانات الوزاري مال السادس الإعدادي سنة 2023، فجأة طلع الأمن السيبراني وصارت عليه ضجّة مو طبيعية بعد نشر وزارة التعليم خبر استحداث أقسام وكليات الامن السيبراني ببعض الجامعات العراقية، ووياها بلّشت دعوات للطلاب بدخول هذا القسم، خصوصًا أصحاب المعدلات العالية، يعني اللي فوگ التسعين وكذا وأول ناس چانوا يدعون هاي الفئة هي وزارة التعليم وبهالسنة نفسها ⦗ دفعة 2023 ⦘ بصراحة ما چان الإقبال قوي، ومعدلات هندسة الأمن السيبراني جانت بحدود 82–86 وكل جامعة تختلف عن الثانية بشي بسيط واذا ذاكرتي ماغدرتني فحتى بعضهم 79 انقبلوا
وهاي الأرقام صراحةً طبيعية ومعقولة وما بيها شي، بس بعدها بسنة كلشي تغيّر لات دفعة 2024 انفتحت عليها حملة تهويل مو طبيعية، فيديوهات بكل التواصل الاجتماعي ، ناس تحچي بثقة غريبة لدرجة يگولون تعيين مركزي، مستقبل مضمون، أحسن من الطب، تدخل تضمن مستقبلك وهواي خريط وحتى اللي ما چان يگول تعيين مركزي صريح، يلمّح بطريقة تخليك تصدّگ
والطلاب؟
ركبوا الموج وهاهيه كلها صارت حلمها تدخل أمن سيبراني وإجاهم واهس قوي وبصراحة هنا بلّشت المصيبة لان معدلات القسم طلعت لفوگ بشكل خرافي، وصل المعدل 94 وأدنى معدل وصل 91.14 بالتقنية الشمالية بالموصل (صباحي). وبعدها الناس تخبلت أكثر، گاموا يدخلون مسائي وأهلي، وكلهم بنفس الفكرة “بي تعيين ومضمون وباقي الخايط”
لا دفعة 2023 ولا 2024 ولا 2025 أكو شي اسمه تعيين مركزي للأمن السيبراني واصلا حتى بهذيچ الفترة چانت اخبار هواي تگلك حتى الطب يتوقف تعيينه المركزي وفعلاً هذني الدفعات ديطالبون هسه بالتعيينات فإذا هذوله عدهم قرار بتعيينهم مركزي والقانون وياهم وماتعينوا انتَ شلون تريد تتعين!!
واللي دخلوا على هذا الأساس، هواي منهم هسه ديحاول يحول لقسم ثاني ومنهم حولوا أصل ليش؟ لأن القسم صعب ومتعب ومو للجميع
الأمن السيبراني مو مادة وحدة ولا موضوع بسيط، هذا بحر معلومات. شبكات، أنظمة، برمجة، مفاهيم هوايه وثکيله، وتعلّم مستمر ⦗ ركّزلي بهاي تعلّم مستمر ⦘ وحالياً اللي دخل وهو ما يحبه ⦗ ركّز گلت مايحبه يعني دخل بس ويه الموجه ⦘ ، يا إمّا أيس، يا إمّا گعد بس يحاول ينجح وخلاص د يا إمّا ديحاول يتصالح ويه نفسه ويتقبل القسم
وهنا الفكرة اللي محد ذكرها الهم وهسه جاي يستوعبونها، هذا القسم ما يفيد بس اللي عنده شغف حقيقي ويحب يطوّر من نفسه بعيدًا عن التهاويل والمسميات وفيكات السوشيل ميديا
لا الجامعات العراقية ولا غير العراقية راح تعلمك كلشي بالمجال خلال أربع سنوات ، تطويرك يعتمد عليك أنت ، إذا ما تحبه ما راح تطور نفسك وإذا تحبه أصلاً ما تنتظر أحد يكلك "تعلّم" انت راح تروح تتعلّم وحدك
ومعلومة أخيرة، مستحيل تتعيّن وانتَ معلوماتك بسيطة ومجرد اساسيات لان وزارة الداخلية وكل المكاتب الحكومية ماتعينك اذا ماتسوي مسابقة لمئات السيبرانيين وتاخذ منهم 3 لو 4 واللي يكونون ذو كفائة عالية كلش وهلشي طبيعي لان شنو يستفيد من يجيب واحد ويگعد يعلمه ، هو يريد مواهب وكفائات
وبالختام الأمن السيبراني مو طريق سهل للتعيين، ولا قسم ينفع للكل ، هو مجال قوي وصعب ويستاهل بس اللي داخله عن قناعة ويگدر يطلع من حگه مو داخله عن واهس اجاه من كم منشور ، وحتى ما اخرب واهسكم كلش بالمجال راح اگلك شغله ، تدري اذا تحب هذا المجال ودخلت غير تخصص تگدر تتعلمه وتصير احسن من اللي دخل القسم وجاي يدرسه كتخصص جامعي بس مو كحب، جاي يدرسه علمود السمعه والطشّه وتخيل وياي شگد تختلف من يكون حلمك ومن يكون للطشّه وانتَ دگه دبنگه كلشي متعرف بي وتريد تدخله علمود السمعه
