👉DHUGA BAATUU TAHI!👈
➧Waldaa fi dhalootni ergama fi dhuga baatii Wangeelaa keeysaa bahe hundi kan jireenya keeysaa bahe, warra summiiwwan biyya lafaa fi jaalala isheetiiniis iddamaniidha. Kanaafuu dhuga baatuu tahi!
➧Waa'ee warra jiraatootiif Kitaabni Qulqulluun📖 hogguu dubbatu “Isin garuu, hafuurri qulqulluun yommuu isin irra bu'u, humna in godhattu; Yerusaalemitti, Yihudaa hundumaatti, Samaariyaatti, hamma andaara lafaattis dhuga-baatuu koo in taatu" isaaniin jedhe.” HoE. 1:8
🖊Gooftaa fi Fayyisaan keenya Yesuus Kristoos erga du'aa ka'een booda; lafaa fi waaqarrattiis aangoon guutuun akka isaf kannamtee fi hanga dhuma baraattiis akka isaan waliin tahu yeroo barattoota Isaa abdachiisetti; gara biyya lafaa hundumaa dhaquun saboota cuuphaa, barsiisaa fi duuka buutoota Isaa godhaa akka socho'an isaan ajaje kanaafiis kan isaan barbaachisu humna ol waaqarraa dhufu kan hidhannaa amantaa fi tajaajilaa guutuu taasisu Hafuura Qulqulluu akka arkachuuf jiran isaan abdachiisuu Isaa arkina. Humni kuniis kan dhuga bahiinsaaf gahaa isaan taasisu humna humnoota caalu tahuu arkina. Dhuga bahiinsaafiis daangaan isaan hin ceene hin jiraatu eegalliif Yeruusaaleem godhatanii handaarri fi daariin lafaa hundi ammoo kan isaaniif akeekamee fi murtaheedha. Kaayyoon guddaan ergama isaanitti kannamee ammoo du'aa fi du'aa ka'uu Yesuus labsuun namootniis amanuun karaa badiinsaa kan keeysa jiran, firdii du'aa kan itti hidhaman, bulchiisa sheyxaanaa kan keeysa jiran, amantaalee sobaa kan hordofan fi jiruu isaanii isa gadheerraa deebi'uun yaada garaa isaanii geeddaratanii abdii Abbaan dhaloota dhufuuf kanne akka dhaalan afeeruudha.
🖋Ergamoonni du'a, du'aa ka'uu fi Fayyisaa kophaa tahuu, mohichaan ol bahuu isaa fi ulfinaan deebi'ee dhufuu Isaaf dhuga baatuu tahuun; Yeruusaaleem irraa eegaluun lallabaa fi barsiisaa tajaajila dinqii fi milikkitaan guutame kan humni dhugaa itti mullate kennaa; ganna soddoma yeroo hin caalle keeysatti hanga qarqara lafaattiis ergicha waliin gahuun isaanii dhugaa Kitaabni Hujiin Ergamootaa nutti himuudha.
🖋Yaa amanaa dhugaa ati dhuga baatummaaf yaamamtee jirta; dirqama kana karaa milkaa'aa taheen akka raawwattuuf ammoo humni Hafuura Qulqulluu siif kannameera. Yeroo garii Hafuurri Qulqulluun afaan haaraya dubbachuuf, harka mataarra wal kaahuun humnaan arkachuuf, dinqii adda addaaf, mullataa arkuuf, ergaa dubbachuuf fi kkf qofaaf kan kanname hamma fakkaatutti lakkoofnee darbuun keenya ni mullatta; garuu isaan kunneen kannaawwan hafuuraa tahan illee kaayyoon Hafuurichi dhufeef ammoo Fayyistummaa Yesuus akka dubbannuuf dha. Dhuga bahiinsaaf jireenya keenya kan kannine taanee arkamneerra yoo tahe; kun mallattoo Hafuura Qulqulluun guutamuu keenyaa isa hangafa.
🖊Jacha "Dhuga baatoota kiyya taatu" ja'u yaaduun maatii, firoota, hiriyyoota, hidhatoota hujii keenyaa, namoota beeknuu fi carraa kamiin illee walitti dhufnu fi kkf hundaaf Fayyisaa fi karaa fayyinaa kan kophaa tahuu Yesuus dhugaa bahu qabna. Gaheen keenya dhuga baatummaa yoo tahu gaheen Gooftaa ammoo dubbii nuti dhugaa baanetti ija godhuun namoota fayyisuu fi tajaajila keenya malikkitootaan mirkaneeysuudha.
✝Yaa firoota koo hadaraa nutti kannamte finxaan baasuuf iddoon mijjataan eegnu hin jirtu, iddoo, yeroo fi haala kamuu keeysatti dirqama keenya haa baanuu!
Tajaajilli keenya iddoo osoo hin tahin laphee mijjata filata.
Namootni Fayyistummaa Yesuus akka dhugaa baanuuf barbaachisan Waldaa Kristiyaanaa qofa keeysa osoo hin tahin karaa fi iddoo nuti jiraannu, sochoonnu, hojjannu hundumaa guutaniiru. Kanaaf dhuga baatii fi lallaba ergama guddichaa tiif dirqama waltajjii Waldaa qofa nu hin feesisu, dhuga baatuu dhugaa tiif iddoon hundi waltajjiidha.
Mee torbee kana nama meeqaaf fayyisuu Yesuus dhugaa baate? Torban dura kee jirutti hoo nama meeqaaf dhugaa bahuuf karoora qabda?
🙏Eegaa
👉Dhuga baatoota haa taanuu!
👉Gooftaa ni jaalattaa? Fayyisuu Isaa dhalootatti himi!
👉Saba kee ni jaalattaa? Wangeela fayyinaa itti himi!
𝑩𝒂𝒓𝒓𝒆𝒆𝒔𝒔𝒂𝒂𝒏:- 𝑯/𝑾 𝑨𝒃𝒅𝒖𝒔𝒂𝒍𝒂𝒂𝒎 𝑹𝒖𝒅𝒖𝒘𝒂𝒂𝒏
Eebbifamaa😘
