السلام عليكم ، كلام مهم لاي حد هيدخل ميديكال فيلد او اي حد جايب فوق ال ٩١ السنادي وياريت اللي منكم عنده جروب ثانويه ينزل عليه يا دكاتره علشان ما يوقعو في الغلطات ويبقو تايهين ف الكليه
لو انت جايب فوق ال ٩١ بإذن الله وهتدخل ميديكال فيلد حاول تقرأ كتب في الكام يوم دول وتكون كتب بالانجليزي وياريت لو في نفس تخصصك اللي انت ناوي تدخله بإذن الله يعني لو انت ممكن تدخل بشري حاول تشوف في حتتك حد كان في طب بشري او أسنان وقوله محتاج كتاب فسيولوجي ( علم وظائف الجسم ) او كتاب أناتومي ( علم التشريح ) ولو انت هتدخل صيدله ابدأ إقرأ في كتاب الفارما ( علم الأدويه ) وابدأ اقرا فيه وحاول تخلصه في الأجازه ، والله كتاب واحد بس هيفرق معاك في اول شهر من الكليه وهيخليك من أشطر الناس في تخصصك ايا كان التخصص اللي انت هتاخده سواء طب او غيره لو كانت كليتك بالانجليزي عامة
ده ببساطه لأنك في اول شهر من السنه بتكون بتدور على سكن لو مغترب وكمان هتعمل أكلك وكل حاجه هتكون قائم بيها على نفسك وفوق كل ده عمال تترجم كل كلمه لوحدها وكأنك ما شوفت انجليزي في حياتك والموضوع ده بيترتب عليه انك بترااااااكم كمية دروس ومواد وممكن لاقدر الله تشيل بسبب انك لسه ما خلصتش الماده والامتحان على الأبواب ، ف علشان تكون شاطر من قبل ما تدخل الكليه ومعاك شهر أهو حاول تاخد على جو قراءة الانجليزي اللي في الكتب لانك هتذاكر بالانجليزي وهتمتحن بالانجليزي وهتكتب ف الامتحان بالانجليزي ف حاول بقدر الامكان تتجنب انك تراكم في اول السنه
سيبك بقا من جو كورسات الانجليزي وجو الكورس التأسيسي و cyan يعني ازرق ، و erythro يعني أحمر ، والله مش هينفعك بحاجه نهائيا وهتلاقي كل اللي عملته طول الاجازه اول محاضره ( حصه ) في الدراسه ، واحنا والله اتعلمنا كده ولكن ده اخد معانا حوالي شهر او زياده كمان لحد ما اتعودنا على قراءة المواد وفهمها لان المواد كمها كبير والمهله صغيره ف علشان تتجنب ده إقرأ في الأجازه ، اللهم بلغت اللهم فاشهد واعتبرها رساله من ربنا ليك علشان مش كتير اللي هيقولك الكلام ده وبس ياسيدي متنساش تصل على النبي 🤍
Forwarded fromAtlas group 2nd grade 🩺
4July 28, 2026 468 4 5
