أنا وقتها قرُبت وشاورته سكته قلتله هيا إرتحت ياسنوه ومفروض تزيد تقلق أكثر وهو ماعتزرطه إلا مع الدولة ههههههههههههههه
المهم بعدا أنا فعلت أسبوعين وخرجت وهو ندع ثلاث سنين حبيب الدولة هههههههههههه
بعدها دخلوني ساع اذي هو حوش كبير وبعده حوش أصغر وقالولي إجلس هانا ولاتتحرك ولاتبعد اللثام من عيونك وجلست أفكِّر كيف ذلحين عيدرو في بيتنا ماحصل لي واين قدنا ومن عيقولهم وماعيدروش
وماعيبدأو يبحثوا عني إلا أقل شي من تسع العشي ومطلَع لنهم عارفين إننا حالي حال نفسي وماناش حق مشاكل ولامعي غريم شخصي ولانا حق تأخير ولاكنت وقتها مفسبك ومتابعين ولا كنت أزبج حتى ع يحيى سرور
والوقت قدو وقت تسبيحات المغرب وحسبنا الله ونعم الوكيل بنسمعها من مكرفونات الجوامع
وخلوني لحالي بالحوش هذا جالس ع الأرض ومرتزح ظهري لاعرض جدر وايديي مقيدات للخلف ومغمضات عيوني بلثام
ولمدة أكثر من ساعتين ع هذا الوضع وبدأ الليل يدخل ولابه نخس ولامخلوق سائِل عليا
وفجأة بدأت أبرَد ويتقشوَط جسمي وارتعش خفيف من الجو ومن الخوف وأثناء هذا الهدوء بدأت أنعِّس ويجيلي نوم الخايف المظلوم المغلوب ودخلت بمرحلة اللاوعي الفاصله بين الواقع والإنتقال للحلم
فجأة وبهذا الموقف والوضع اذي انا فيه تخيلو كان به بالصدفه دمّه صغيره من هولاك اذي عادهن متعلّمات للمشي والتسلّاق وصووع ويخطين بخواشه وشعكله وكانت بتخطى فوق الجدر اذي أنا مرتزح ظهري لاعرضه وهي فوق راسي بالضبط
ومدري كيف تكحولَت بنت الحراام وندعت شعكاله الدمه من فوق الجدر ونطلَت لاحظني وانا ساهي بعد تفكير ساعتين وصمت وانتبزنا الاثنين من الفجيعه ونكزنا أنا والدمّه وهي بتبرخش بحضني ومربوشه ومفتجعه من نكزتي وكان عتشلخط لي الموضوع
وانا بينفحر في القع ومقيدات أيديي لاوراء وكل واحد فجّع الثاني والدنيا عوافي وانا ولانا داري حتى ماهيه اللي نطلََت لافوقي ولاتوقّعت إنها دِمّه تِرحِم
ورجعت صيّحت بأعلى الصوت مسررَع بدأتوا التعذيب خلاااص ورب الكعبة لا أعترف بكل شي
رجعت أقل في نفسي ليش صحت اني شعترف وبمه شعترف أصلاً وأكبر نثره بحياتي يمكن يوم دخلت فجر لصديقه أربعينيه خاص وقولتلها غر مساء الخير وحاسس بعيونش حزن عميق
وهي ردّت عليا وقالتلي عميق عارك هذا الساع ورحلك منّي أنا قدنا ساع أُمك
وبعدها جا واحد وقلي مالك بتتجعور لحالك أنت والدمّه هانا وعادك لاحد الأن ماقد احتبستش ولاقد دخلت زنزانه والأن عادحنا عندخّلك
قلتله أهه يعني هذا الصفاط بكله والجعوره أنا والدمه ملان الزفلت وعادحنا خارج باب الباب
يلااا بشّرك الله بالخير وتوكلنا ع الله وبداية مطمّنه
المهم بعدها بدروم وانفرادي مترين في متر لمدة نص شهر بالضبط وع خرجتي التُهمه كانت إشتباه بالأسم
وخلوني كمان أعمل إلتزام خطي أن ألتزم بالنظام والدستور والقانون
ولو هم مش ملتزمين به بس عادي المهم واحد مننا يلتزم به لن ماشو معقول كلنا نفلّت القانون والدستور وحده بدون إلتزام به عيضيق ويدخل بكآبه
ووقّعت توقيع أبي بدل توقيعي قلت علاسب مرّه ثانيه يدخل هو بدلي يحتبس ماشجلسش أنا وحدي كل مرّه يتشبوهو بإسمي وأحتبس وألتزِم أنا وحدي
وروّحت بعد الإنفرادي الأسبوعين جلست المره حقي تدزدزني أسبوع بشقاير برقبتي ونزوَفه بباردي ماء بارد تبتعد الفجيعه
لنها قالت كانت تبسرني وانا راقد جالس أبتسِم وأتحاكى ساع المرور بالإنقليزي
وارجع أقوم أسنِّب فوق السرير وأصفّق 👏3 مرات سريع وأرجع أرقد
وبعدها بدأت أنزِّل سوامل :
يانجوم الليل في سود الليالي وياقمر ياشمس يادنيا دنيّه
وفي سبيل الله ذُقنا المُر حالي ووالله ان الدِم ذا أخصاهن عليّا
ومن بعدها حبّيت الحوسيين ووقعت حوسي بإخلاص رغم اني كنت أحب السيد سلام ربي عليه من وعادهم بعمران بس رجعت حبّيت الكل بعد الخصيه المحترمه هذه
ويجي واحد يقولك صيح انت جاوع والله مانا جاوع واني من يومها وانا شابع شبعه بنت جحبه واحمدالله واذي ماعيشبِعش جوعه عيشبّعوه عيال الناس
واذي عيغثّي انصارالله هذا خصيمي يوم القيامة وهذا إنسان باطر وحرام انهم حنونين
ويكفّيك بس انو يحبسك لمصلحتك لنو كان داري من زمان ان دجاج البروست ضُر ويخلي زد مرتك تحبك أكثر وتشتاقلك وتفعل لك كل يوم صوَرَك حالات بالواتس واغنية تامر عاشورا :
هيقيلي مخصي ودموعو بعينو تعبان
وهدّيلو أسبوع وعيجلس برضو خصيان
المهم ماعلينا :
وذلحين الحمدلله من يومها وانا قدنا في كل عيد زواجي ماعد بينخرجش أنا وبينخليها هي تسير تطلب لنا اثنين بروست ولحتبسَت هي عادي يوم ثاني وقدك بمكرفون سع أصيل ودمعتين وأغنية :
واليوم شعلن فرحتي والله يديم أفراحنا
وياريت وهي كانت معي تشتي بروست مفعل أنا
واليوم شعلن زفّتي وفي الحبس فاصوليا هنا
August 18, 2026 622 3
