سلسة كيف تتعلم الطب ❓ 📌 بوست المقدمة التعريفية عن السلسلة و هدفها… — Easy Medicine |Introductory Module

Forwarded fromEA

سلسة كيف تتعلم الطب

بوست المقدمة التعريفية عن السلسلة و هدفها :

واقعيا لو نزلت تشتغل بأيدك و تمارس المهنة و تحتك بقا بالمرضي و الناس الأكبر منك هتلاقي الناس اللي ماشيين بالجايدلاينز و عنده تفسير علمى لكل حاجة و خطوات ممنهجة بسيستم محترم وضعه ناس مختصين بناءا على دراسات عديدة تم تجميع الداتا منها للوصول للرأي العلمى الصح ، دول نسبتهم لا تتخطى ال 20% بل و أقل ،

و دا بيرجع لأن المعظم اما بيدخل المجال و يشتغل بيركن فكرة القراءة من الكتب و متابعة كل جديد نظرا لبيئة العمل الصعبة و نظرا لضيق الوقت و عدم حب القراءة و التعلم برضه بحجة انا هتعلم من الأكبر منى و خلاص و اخد الخبرة و امشي الدنيا و اهم حاجة الشغل اليدوى بلا كتب بلا جايدلاينز انا الجايدلاينز ليه امشي ورا حد ، و تمشي بقا و تكمل فى السكة دى لو انت اصلا من البداية كنت بتذاكر فى الكلية و ممشي دنيتك مش كنت مطنش كل حاجة و بتعدي بالبصمجة

المشكلة الكبري ان شغل الاونطة و التعلم عن طريق التجربة و الخطأ و اللي تنفع مع العيان دا تبقا هيا اللي تنفع مع كله دي طريقة خطأ جدا و للأسف هيا الطريقة الشائعة و للأسف بتخلى كل واحد ناهج جايدلاينز بتاعته ماشي بيها فكل واحد تلاقي ماشي فى إتجاه و مفيش سيستم موحد للكل و دا سبب انتشار افكار الجماعة بتوع الطب البديل و انا اخترعت العلاج الجامد المتين اللي محدش فى العالم عمله و التهجيص و ضياء العوضي و جودة وبتاع الكركمين و الشلة دي و بينتج عن دا ضرر للمرضي بتوعك و أحيانا عاهات مستديمة أو الموت و كل دا ذنوب جارية و انت فاكر انك ماشي صح و لذلك بتلاقي عندك لو حالة مش مشهورة شوية بس عادي و موجودة فى كل الكتب و سهل تشخصها لو بتقرا و تتعلم ، ممكن تلف على ١٠ دكاترة و اكتر عشان حد يشخصها و محدش بيعرف و المشكلة بيلحق العيان الضرر من كل التجارب الغلط دي.

الموضوع دا لو فتحنا فيه هنتكلم عن كوارث بتحصل و بتسبب اضرار جسيمة خصوصا فى التخصصات الحرجة زي العنايات و الحضانات و ما إلى ذلك .

فبحاول من خلال السلسلة دي نبدأ نحل المشكلة من جذورها و ندلك ع المصادر الصح اللي تبدأ بيها لو انت لسه طالب فتلحق تلم نفسك أو خريج و عايز تعوض اللي فاتك و تتعلم بنفسك لأن حتى نظام التعليم الطبى فى مصر سئ و مش هتتعلم لو اعتمدت ع النظام فقط .

حاول تاخد الموضوع بجدية أوي عشان ما تقعش فى الفخ دا ، لأن حرفيا المهنة دي زي ما ممكن تدخلك الجنة ، ممكن تدخلك النار و انت مش داري ، لأن اي دواء تكتبه و انت مش عارف كل ما يحيط بيه أو عملية جراحية تعملها و هيا مش ضرورية أو تشخيص غلط و هيا حالة فى صميم تخصصك هتتحاسب عليها عند ربنا و الفلوس اللي هتاخدها منها هتبقا حرام .

فأتعلم كويس و راعى ربنا و متستعجلش ع الفلوس اصبر و كل حاجة هتيجى فى وقتها و أبعد عن اي شبهة فيها حرمانية و بالذات لو تتعلق بأرواح البشر فما اعظم عند الله من حياة الأنسان .