🔴 الفرمتة :
🔹 بهاد البوست رح احكيلكن عن الفرمتة وكيف منعملها.
🔹 بالبداية وقبل كلشي اذا ما كان عندك ارضية منيحة بهالامور يفضل تاخدو لعند شخص مختص يفرمتلك بكون أفضل مشان لا تفقد البيانات ومشان لا تخبصلك شي خبصة لانو بقلولك اعطي خبزك للخباز لو اكل نصو..
🔹 بس في عالم بتحب تتعلم وتتجرب ومقتنعين ب مبدأ يلي ما بخيس ما بكيس وهدول الناس يلي بحبن عيني ربكن مأحلاكن ❤️
🔸بالبداية وقبل ما تبلش فرمتة لازم يكون عندك يا اما DVD فرمتة او Usb تحرق عليها الويندوز يلي بدك ياها طبعاً أغلب الأجهزة الحديثة صارت عم تجي بدون سواقة لذلك خيار ال DVD صار قديم شوي بس إذا جهازك بيدعم سواقة أوك ممكن تمشي امورك وإذا ما عندك سواقة تابع معي لقلك :
🔹🔹بالبداية قبل ما تبلش فرمتة لازم يكون عندك :
▫️فلاشة شغالة 8Gb وطلوع.
▫️نظام ويندوز يلي بدك ياه بصيغة ISO.
▫️لازم يكون معك برنامج RUFUS مشان تحرق الويندوز ع الفلاشة.
▫️لازم تعرف نظام الهارد عندك GPT أو MBR.
▫️لازم يكون معك باقة نت شي 1-2 غيغا مشان تحديث التعاريف بس خلصت فرمتة.
▫️لازم يكون عندك برنامج Driver Booster مشان التعاريف.
1 - بتنزل تطبيق Rufus طبعاً حجمو ما بيتجاوز 2 ميغا بتفوت ع chrome وبتكتب Rufus Download بتفوت ع أول موقع وبعدين بتعمل خيارات وبتحط إصدار الموقع الاكتروني او سطح المكتب وبتنزل بالموقع بتدور ع كبمة تحميل وبتحملو وبس تحمل معك ثبتو ع لابتوبك او كمبيوترك طبعاً بتفتح ال RUFUS بتطلعلك الواجهة يلي تحت بالصورة رقم 1 وبيطلب منم بالبداية وبأول خيار :
▪️الجهاز : وهون قصدو ع الفلاشة انت بتحط الفلاشة بالكمبيوتر وبتعمللها فرمتة بتلاقيها طلعت جوا ال Rufus عند كلمة الجهاز.
▪️اختيار نوع الإقلاع : وهون قصدو ع نسخة الويندوز يلي بدنا نفرمت عليها وهي مننزلها من موقع مايكروسوفت منفوت ع chrome ومنكتب download win 10 iso طبعاً انا هون اخترت ويندوز 10 انت فيك تختار شو ما بدك ... وبتنزلوه من موقع Microsoft حصراً.
▪️خيارات صورة القرص : بتحط تنصيب الويندوز الأساسي.
▪️هلا مخطط التقسيم وهاد شي مهم كتير كتير وعنا نوعين GPT و MBR طبعاً نحنا منعرف نظام الهارد عنا عن طريق :
- بتفتح القائمة أبدأ وبتبحث عن CMD وبس لاقيتو بتعمل عليه خيارات وبعدين فتح كمسؤول.
- بيفتح معك بتكتب بالبداية diakpart.
- وبعدين بتكتب list disk.
- بتلاقي طلعت الأقراص بوجهك ومكتوب انو القرص وحجمو وآخر شي ع ايدك اليمين بتلاقي يا اما مكتوب MBR او GPT متل الصورة رقم 2 تحت.
▪️بعدين عنا النظام المستهدف وعنا نوعين UEFI او BIOS طبعاً ومنعرف هاد الشي عن طريق :
- بتكبس زر '' win + R ''.
- بتكتب بالمستطيل msinfo32 وبتعمل OK.
- بتفتح معك قائمة بتدور فيها ع Bios mode وهون يا اما بتلاقيها UEFI او LEGACY و عهالاساس بتحدد النظام المستهدف.
▪️بعدين نظام الملفات حطو NTFS.
▪️وحط ع تهيئة سريعة وبعدين كبوس ع أبدأ.
▪️ما بتشيل الفلاشة من الجهاز لحتى تشوف محل الخط الأخضر يلي بيمشي كلمة أنجز.
▪️هون بتشيل الفلاشة وبتصير جاهزة لتفرمت عليهآ.
🔸 طبعاً هيك منكون خلصنا من الشي الصعب وضل عنا الشي السهل وبكرا انشالله رح اشرحلكن ياه.
3February 3, 2026 452 4
