لمجرد انك مديت عنيك علي غيرك, ده صورلك انه حياتهم ورديه ومعندهمش المشاكل اللي كتبتهالك فوق فحياتك ومعتقد انهم عملو الجسم ده او الستامينا دي في شهرين تلاته وهنا كارثة مد العين.
الكلام اللي فوق ده تمهيد عشان اكتر حاجه بشوفها في اللي بيبدأو في مجالنا مؤخرا هي انهم بيقعدو خمس ست شهور ويوقفو ده اذا كملوهم, طول الوقت خايف انه ال ai هياخد مكانه وعمال يتابع نجاحات فلان وعلان خد كورس كذا واشتغل فكذا, نفس قصة مد العين!
وده طبعا بيضطرهم انهم لو متركوش المجال كله فساعتها بيبدأو ينشرو حاجات fake ولا حاجات تعبانه ملهاش اي قيمة ويعمل منها حوار كبير عشان يقول لنفسه وللناس بصو انا كمان بتعمل زي اللي هناك دول ما بيعملو..
مين يا حبيبنا قالك انك في سباق مع حد؟ ليه مصر تحط نفسك في نص السباق أصلا!
قولا واحدا, عايز تكمل في أي مجال, اقطع ودانك وغمي عنيك أول ست شهور. خدها قاعده كده فأي مجال, الجيم بقي برمجه سايبر سكيورتي لغات وترجمة حتي لو هتفتح محل كفته
أول ست شهور هما الفارق فحياتك في أي مجال, وهما اللي هتسمع فيهم كل الاحباطات وهما اللي مش هتسمع فيهم كلمة تشجيع واحده. فتعمل ايه؟ الله ينور عليك, تنقطع عن السوشيال ميديا وعن أي مصدر بيفضل طول الوقت يقولك فلان عمل وفلان سوا وفلان وصل لكذا زي LinkedIn كده, ايوه انقطع عنه ومترجعلوش غير بعد ست شهور.
طب اثناء الست شهور دول هعمل ايه؟
هتذاكر وتجتهد من أي مصدر متاح قدامك مش فارق حرفيا هو ايه, افتح اليوتيوب واكتب كورس تعلم كذا, اسال شات جي بي اتي ابدأ منين في كذا. افتح شات جي بي تي وقوله انا عايز اشتغل في مجال كذا ومعايا ست شهور مش هعمل حاجه غير اني اذاكره ودي المتطلبات الوظيفية في المجال ده نسختها من اعلان وظيفي علي LinkedIn قولي اعمل ايه واعملي خطه للست شهور دول وهتابع معاك كل شهر انا وصلت لايه. بس كده؟ اه بس كده!
اعمل كده ومتمدش عنيك, كله عدي بنفس اختباراتك بل وأصعب بمراحل انت بس شوفت لحظات تكريمهم فبدأت تقارن موسم زراعتك بموسم حصادهم.
يلا يا صاحبي, اقطع ودانك وغمي عنيك وابدأ, معاك ست شهور
اي حد يقدر يطبق دا وهينجح ف حياته
بوست من صفحة بشمهندس Mesh Ebrahim Hegazy
