الأبــرار

وما تلخبطوش روحكم بين سلسلة المهندس والسلاسل التانية. يمكن ننصح بالأيقونة في الأحياء، يقولوا إنها أشمل وأوضح، ولكن حتى كتاب المهندس اني قريت منه، ربي يبارك، ومفيش معلومة مش حاطينها فيه للأمانة يعني.
أما باقي المواد، حتى الرياضيات، بين الكتاب الأسود والمهندس، ما فيش فرق هلبا. أنا نشوف نتابع مع سامي الغريب وبثوثه، ولكن كتابي لأمجد التير وعدنان أغميض، وما يفرقش في الأمثلة، نفس المنهج، نفس الأمثلة، عادي.
وخلاص، وعن تجربة، الكتب مفيدة جدًا جدًا، تقدر تعتمد عليهم، وتلوح الكتب المدرسة على جنب بشكل نهائي.
لأن كتب المهندس شاملة حرفيًا لكل شيء، وكتاب التدريبات وأي كتاب حتلقاه في كتب المهندس.
الحق ما شاء الله، ربي يجزيهم خير جزاء الأساتذة اللي كتبوهم. والله استفدت منهم بنسبة كبيرة جدًا، لأني ما كنتش حتى نحضر شرحهم هلبا، حضرت في الفترة الثالثة بس يمكن، وشفت الدروس اللي مش فاهمتهم.
والحمد لله جبت درجات مرضية وكويسة في الفترة الأولى والثانية. كنت نقرا في كل امتحان من كتب المهندس.
صراحة ما خذيتهمش بكري، كتب المهندس خديتهم في نهاية الفترة الأولى، ننصح تاخدهم من البداية، حتى الاختبارات تقرا منهم، والامتحانات، وحتى تقدر تلم، وعادي جدًا.
الفترة الأولى والثانية، زي ما قلت، ما فيش ضغط، زي أي سنة عادي. قراية عادي بين اختبارات وامتحانات وبس. (نكرر فالكلام باش تطمنوا بس، لأني حسيتكم صايرلكم زيي رهبة ما قبل الشهادة وتوتر من تو 😭).
وبعدين الفترة الأهم والمهم، واللي لها أهمية كبيرة، هي الفترة الثالثة، واللي تمثل 70% من النتيجة.
الفترتين الأولى والثانية 30%، مقسمة لـ15% الفترة الأولى و15% الثانية، والفترة الثالثة 70%.
فحتركزلها هني ال70%، حتى لو ضيعت وقت، تقدر تلم.
أنا ضيعت وقت في أغلب المواد. ضيعت وقت إني أصلًا ما كنتش عارفة إني مانيش فاهمة الدروس بالشكل الصحيح. كنت ماشية على نظام بعض الأبلات اللي ما كانوش شرحهم صح أو ما كانوش يتعمقوا في تفاصيل الدروس.
فالحمد لله لحقت وفهمت من الأساتذة وقنواتهم وكتبهم، ولا اشتركت أكاديميًا ولا غيرها.
بديت من قبل شهر بالضبط من الامتحانات.
الشهر هذا درت فيه جدول واضح، مشيت فيه والحمد لله تمام ومستمرة. ورغم التعب، تعب تعب، لأني حرفيًا طول اليوم أنا نقرا. صح في راحات، ربع ساعة بين ساعتين، نص ساعة بين ثلاث ساعات، وهكذا.
ولكن تعب وإرهاق، وكنت كل يوم نوض ونكمل ونشوف جدولي.
وبعدين مش حنسبق وقت الحديث هلبا، لأن مزال هلبا عليه، ولو تبوا الجدول لما توصل الفترة الثالثة إن شاء الله كلموني عادي.
وبإذن الله بعد ما تكونوا كملتوا الفترة الأولى والثانية، صح حتعرفوا الفترة الثالثة شن واجب عليكم تديروا، وكيف جدولكم حتحطوه، وشن المواد اللي ليها الأهمية، وشن المواد اللي تاخد أيام أكثر، وشن المواد اللي مش فاهمينهم، والمواد اللي ما كانش شرح أبلتها كافي، وهكذا.
والحمد لله قدرت نكمل المنهج عادي جدًا. كملته وفهمته صح. في أغلب الحاجات اكتشفت إني كنت فاهمتهم خطأ، يعني كطرق حل، كمسائل. الحمد لله كملته وفهمته وجيت للامتحانات.
طبعًا خلي أسئلة الوزارة على جنب، إن لعبوا فينا بجد وجت أسئلة خارج اللي قريناه، خارج المنهج، تعمق أكثر.
بالنسبة لكتاب المدرسة، ما يجيش ولا واحد في المية منهم، مستوى كتاب المدرسة جنب مستوى الأسئلة ميجيش ولا واحد في المية، وحسبي الله ونعم الوكيل.
المهم، المهم، أعتقد فضفضت هلبا، شرحتلكم هلبا. هادي تجربتي، وهادا اللي قدرت ننصحكم ونفيدكم بيه مبدئيًا، ونطمنكم إنها مرحلة عادية، وما تخافوش منها.
توكلوا على ربي، وبإذن الله تقدروها وأنتم قدها وقدود.
زي ما فاتوا السنين اللي قبلها، حتفوت.
أنا شخصيًا كنت واخدة عليها فكرة غلط، بعد جربت طلعت غير تمام عن يلي كنت حاطاته في بالي.
وحاولوا تصنعوا فيها ذكريات حلوة. الجانب يلي ناسيينه إنكم تصنعوا فيها ذكريات، لأنها حتكون مرحلة مميزة من الثانوي، غير عن المراحل الثانية.
حاولوا تكون صداقاتكم طيبة، ابتعدوا عن كل من يأذيكم واستغنوا عنهم، وحاولوا تخلوها السنة هادي للناس اللي تستحق فقط.
طلعت من أساس الموضوع، ولكن حتى هذا الجانب بجد مؤثر جدًا.
واللحظة اللي بتطلعوا منها من المدرسة، وقتها حيكون ليكم آخر امتحان في الفترة الثانية. وحيكون لحظة أخيرة بكل، صح يمكن إني حساسة بزيادة، ولكن حتأثر فيكم.
مش حتتخيلوا إن المدرسة اللي كنتوا كل يوم تمشولها وانتو كارهينها، حتحبوها في هداك اليوم. حتتمنوا ما تطلعوش منها، حتتمنوا لو تستمر أكثر، وحيجيكم فلاش باك لكل الذكريات اللي عشتوها فيها.
فاستمتعوا بيها بجد. وما تضيعوش وقتكم كله في القراية وتحسبوها إنها قراية بس. لا، فيها جوانب ثانية، انتبهولهم.
وحاولوا تخلووا في مدرستكم وبين زملائكم وأصدقائكم أثر طيب. ما تخلوش أذية أو حاجة يتحسب ربي فيكم عليها، أو تكونوا سبب في كسرة خاطر حد، يعني خلي الناس تتفكرك بأحسن شي.
وإن شاء الله ربي يوفقكم وتطلعوا منها بأقل الأضرار

السلام عليكم ورحمة الله وبركاته.
اليوم حنتكلم عن موضوع مختلف عن محتوى القناة، والموضوع حيكون خاص شوي، طلبوه مني شوية مشتركين من القناة، وحنتكلم عليه لأن أصلاً نبي نخليه كذكرى ليا فالقناة، وحيكون تجربتي الشخصية ورأيي الشخصي في الموضوع.
الموضوع هو ثالثة ثانوي (الشهادة الثانوية)، المرحلة هادي والمعروف إنها أصعب مرحلة مقارنة بالثانوي والإعدادي، ولكن هي كأي مرحلة في حياتك، من المدرسة عادية جدًا، ومتستحقش تكبير المواضيع اللي صاير والخلفية اللي يعطوا فيها عليها للناس اللي مقبلين عليها.
المهم مش حنطول عليكم الكلام، ونبدأ بنصايحي لدفعة 2009 وحتى للدفعات اللي بعدها. عارفة يمكن كلامي مش حيقراه إلا شخصين تلاتة عشرة، لكن حنعبر.
أهم نقطة في هالسنة إنك تنوي وتعزم من البداية إنك حتجيبها بجهدك وعرقك. يعني كلامي للي ناوي يقرا ويتعب ويجيبها بتعبه، مش للي ناوي ياخدها بالساهل وبالغش. ولو تبوا نتكلموا على الغش في موضوع تاني حاضر.
المهم، من البداية زي ما قلت، توكل على ربي. أهم شي تكون علاقتك بربي صحيحة: صلاتك، فروضك، أذكارك، قيامك، هذم كلهم أساسيات. وما تقوليش إنهم معرقلين القراية، بالعكس، مهمة جدًا وحتساعدك.
ومادا بيك تخصص حتى وقت لورد من القرآن، لأن القرآن ما زاحم شيئًا إلا بارك فيه، والله عن تجربة. أنا قلت يمكن نسيب قراية القرآن، ولكن استمريت فيها، وهذه أجمل شي درته، ويباركلك في وقتك وجهدك بإذن الله.
وراهو ثالثة ثانوي سنة عادية جدًا. صح صعبة، وحتَمُر عليك أيام صعبة لأن المنهج متراكم، ومش حتكون طالب مثالي زي ما متوقع، يعني أكيد حيكون في سهوات ولو بسيطة، حتى مع تراكم المنهج.
وبالنسبة للمنهج، ما تتعبوش أرواحكم وتقروا من العطلة. لأن والله أكبر غلطة هي إنك من البداية تستهلك طاقتك، وفي الفترة الأخيرة المفروض تكون فاهم ومجمع طاقتك وتحط أكبر طاقتك وتقرا. حتكون منتهي خلاص، يعني الإنسان قداش منه عنده طاقة محدودة وحتنفد خلاص؟
فما ننصحش بيها أبدًا، وهذا رأيي الشخصي وعن تجربة. ولو إنت أعلم بنفسك، يمكن تعرف روحك وتقدر إنك تصبر هكي ومجرب من قبل، يمكن من السنوات اللي فاتوا تقرا من العطلة، فوقتها كل شخص وقدراته.
وكذلك في الفترة الأولى ما نقولكش اقرا كل درس بدرسه، الدرس اللي مش فاهمه فقط هو اللي توقف عنده وتركز عليه.
ولو كانوا معلماتكم مش مساعدينكم، يعني عندك ضعف في مادة، أو معندكش فيها أبلة، أو الأستاذ أو الأستاذة مش موفيين، تمام، هكي تلجأ لحل آخر: القراية عبر الإنترنت.
إما تشترك في المنصة لو محتاج، وحتى أنا بدون ولا اشتراك في أكاديمية أو كورس، قريت من قنوات التليجرام فقط. ويلي يحتاج أي قناة لأي أستاذ، يبعتلي وبإذن الله حنفيده ونبعتهله.
تمام، نرجع لموضوعنا: تابع مع الأستاذ الدرس اللي ما فهمتاش فقط.
أما الحفظ، خليك مع جدول المدرسة. عندك الاختبارات، اقرا فيهم وحاول كل ما يكون عندك اختبار تفهم كل الدروس اللي داخلة فيه وتحفظهم. بهك تكون لما توصل للامتحان النهائي تلقى روحك تراجع فقط، مش تفهم كأول مرة وتحفظ.
والمادة اللي تعرف إن أستاذها مقصر في الاختبارات أو ميديرش فيهم بكل، وقتها هكي تبدأ تخصص لها كل بعد شهر مثلًا، تختبر نفسك في الباب اللي كملتوه، وتفهم دروسه صح وتحفظه.
أما المادة اللي معلمها ما شاء الله، وبارك الله فيهم الأساتذة اللي يكونوا عاطين جهدهم كلهم ومش مقصرين، وعارفين وقت الاختبارات، وعارفين إن الطالب حيراكم، وعارفين لو المعلمة ما تقولش إن في اختبار مش حتقرا، وأنا منهم، لو ما فيش اختبار ما نقرأش، فالحق المعلم ليه دور كبير، مش حتى شرح وامتحان نهائي بس.
والمهم ما تضغطوش على روحكم هلبا من البداية، وطبعًا نتكلم أكتر شيء عن رأيي وتجربتي، فلو شايف إن عندك نفس القدرات، وأعتقد أغلب الطلبة نفس الشيء، فامشي على كلامي.
ولو شايف إنك محتاج تقرا كل درس بدرسه وتحفظ، ومش حتقدر تلم في أسبوع الامتحانات أو في ليلة الاختبارات اللي هما قبل الامتحانات، فأنت وجدولك بعدين دير رأيك.
المهم، زي ما قلتلكم، ما توتروش روحكم، ما تحملوش أنفسكم فوق من طاقتكم، راهي مرحلة عادية، وحتفوت بسرعة ومش حتنتبهوا للوقت لين تلقوا روحكم في الفترة الثالثة.
الفترة الأولى والثانية امشوا بالنمط اللي قلتلكم عليه: في الاختبارات فقط تقروا وحاولوا تجيبوا فيهم درجة كويسة، يعني تقرا وتلتزم، وتلم المنهج كله في كل اختبار، وتفهم من البداية صح.
أي شيء ما تمشيش على الماشي. أي شيء مش فاهمه، برا حتى مراجع تانية، لأساتذة تانية، وحاول تلم كل شيء.
ما تسيبش كتاب الحصة وكتاب التدريبات، رغم إن فيهمش هداك الفائدة، يعني مفيهمش فائدة كبيرة أو ما تقدرش تعتمد عليهم، ولكن ما تخليش ولا سطر منهم.
وأنصح جدًا بكتب المهندس. أنا خديت السلسلة كاملة في أغلب المواد، يمكن التربية الإسلامية واللغة العربية وتقنية المعلومات فقط اللي ما خذيتش فيهم.
أما باقي المواد، من الإنجليزي، من الفيزياء، من الرياضيات، كلهم ننصح بيهم وبشدة.

منعرفش القناة وصاحبها الحق من قبل ولكن انضميت ونبيكم تنضمولها تقروا مناشيرها بما أنها دينية لعلها تكون صدقة جارية له بعد وفاته ولا حول ولا قوة إلا بالله

• لا تستهنْ أو تقللْ من أهمية انتقاء محيطك !

كل هذا له تأثير عليك بطريقةٍ مباشرة وغير مباشرة، ستنخرط فيه دون وعي منك، فيصبح جزءًا من ذاتك !

اذكار الصباح | صلاة الضحى| وردك من القران 🤍.

📚 «حِلْيَةُ الأَوْلِيَاءِ» لِأَبِي نُعَيْمٍ (٩/١٢٣).