🔹🔻🔹
#دئنمه #جستار #Essay
▪️حافیظهنی ساغلاماق اولار، اؤزو ده جمعی حافیظهنی؟
۱۳۷۰ ایللرینین اوللرینده آنادیلینه رجعت، بوتون دانشگاهلاردا و چوخلو مطبوعهلرده گۆجلو میدانلار آلدی. بو مسالهنی هر کیم بیر جور آنالیز ائدیب، روایت سؤیلهییردی.
آما بیر مخالف حؤرمتلی یازارین سؤزو ۳۲ ایلدن سورا هله ده بوگونکو کیمی منیم یادیمدا قالمیش. او آقا دئدی:
سیزین بو ایشیز «بیهوده» و ثمرسیز بیر ایشدیر. سیز سویوق دمیر تاپلاییرسیز.... و بئله بئله سؤزلر...
من او زامان گنج بیر اؤیرنجی ایدیم و اؤز ایشیمیزه ایناملی و ایمانلی اولاراق، هئچ بیر آد قویا بیلمیردیم، آما ایندی او گونکو ایشیمیزی و بوگونکو ایشیمیزی آدلاندیرا بیلهرم، بلکه ده نئچه آد ایله. آنجاق او آدلارین ان اؤنملیسی و عقله سیغانی بودور:
«جمعی حافیظهمیزی قورویوب ساغلاماق!»
انسان تکلیگینده ده اونوتقان بیر مؤوجوددور، مسلما جمعلیگینده ده بئله کاراکتری داشییا بیلر.
سؤال بودور، گؤرهسن بیزیم جمعیتیمیز اؤز اؤزلوگونده، اصلا حافیظه آدلی بیر شئیه اینانیر؟ یوخسا بئله بیر شئیی ناغیل دئیه، مسخره سانیر!
▫️منجه هر بیر توپلوم و جمعیت، جمعی حافیظهدن عبارتدیر. یعنی جمعیت وارسا جمعی حافیظه ده وار، جمعیت یوخسا بئله بیر حافیظه ده یوخدور.
هر حالدا هله بیز ایشلریمیزین «بیهوده» اولدوغونا اینانمیریق.
آما بئله گۆمان ائدیلیر، جمعی حافظهمیزی ساغلاماق (ساخلاماق) مسالهسی هله ده بئیینلریمیزده قاینار قازان کیمی گؤرونور.
«بو قاینار قازانین آلتینین اودو و اودونو، نه قدر دوام ائدهجکدیر؟» سورغوسو، بوگونکو سورغولاریمیزین ان اؤنملیسی اولا بیلر.
@Alimohamadbayani
https://t.me/Bayram
Forwarded fromعلی - محمدبیانی
6
1August 5, 2026 268 2
