تره مو كل سكوت احترام
أكو فرق جبير بين الإنسان الهادئ والإنسان اللي تعلم يسكت لأن يدري حچيه ما راح يغير شي
اكو ناس من يشوفون شخص ساكت عن الظلم لو الإهانة لو الاستغلال لو الغلط داخل عائلته أو شغله عبالهم انو هذا إنسان محترم ما يحب المشاكل
مو شرط
يمكن هذا الإنسان مو مقتنع باللي يصير بس تعب من المحاولة
حچى قبل وما أحد سمعه
اعترض وانكلبت السالفة ضده
دافع عن نفسه فصار هو المشكلة
حاول يصلح وكلمرة خسر شخص أو علاقة أو فرصة
وبمرور الوكت يتعلم الإنسان درس ثاني انو مو كلشي يستحق المواجهة
وهنا يبدي السكوت يتحول لاسلوب حياة.
يسكت عن أخوه حتى لا يخرب البيت
يسكت بالشغل حتى لا يخسر رزقه.
يسكت بالعلاقة حتى لا يخسر الشخص
يسكت عن الغلط حتى لا يسموه حساس
يسكت عن حقه حتى لا يكولون عنه طماع
لكن بالمقابل مو كل مواجهة شجاعة.
أكو ناس يحچون بكل وكت يفتعلون المشاكل و يجرحون الناس ويعتبرون نفسهم صريحين
الصراحة مو إنك تحچي بكلشي
والسكوت مو إنك تخاف من كلشي
لازم تعرف شوكت تحچي وشوكت تسكت
أكو معارك إذا دخلتها تخسر نفسك وأكو معارك إذا شردت منها تخسر كرامتك
دير بالك تعيش طول عمرك وأنت ما تعرف الفرق بينهم
2
1September 5, 2026 16
